გიორგი შაქარაშვილის ბურუსით მოცული მკვლელობა - საქმეში არსებული ერთ-ერთი მანქანა შსს-მ მხოლოდ 2 თვის შემდეგ დალუქა

სამართალი - 12:32, 03 Aug, 2020

1061

გიორგი შაქარაშვილის საქმე - ავტომობილი "ტოიოტა ვიტსი", რომელიც 19 წლის ფეხბურთელის მკვლელობის საქმეში ფიგურირებს, მომხდარიდან მხოლოდ ორი თვის შემდეგ დალუქეს.

გამოძიება ავტომანქანით ორი დღის წინ დაინტერესდა და მანქანა ისე დაილუქა, რომ არც ადვოკატები და არც ავტომობილის მეპატრონე არ გაუფრთხილებიათ. ფეხბურთელის საქმის მოწმეების ადვოკატის თქმით, მისი დაცვის ქვეშ მყოფი პირების გამოკითხვა გამოძიების დაწყებისთანავე მოხდა, აიღეს მათი დე-ენ-ემ-ის ანალიზებიც, თუმცა მანქანა სამართალდამცველებს მხოლოდ ახლა გაახსენდათ. უფლებადამცველი მიიჩნევს, რომ მოწმეებზე ზეწოლა და ფსიქოლოგიური ზემოქმედება ხდება.

ადვოკატი მურმან ღურწკაია ამბობს, რომ თუ რაიმე მნიშვნელოვანი ინფორმაცია ჰქონდათ მისი დაცვის ქვეშ მყოფებს, გამოძიებამ ეს თავიდანვე იცოდა.

"უკვე 2თვე სრულდება ამ საქმის გამოძიების დაწყებიდან და შაბათს ხდება მანქანის ამოღება, დაილუქა და გადაყვანილ იქნა. გამომძიებლებისთვის, საგამოძიებო ორგანოსთვის ეს ცნობილი იყო იმ დღიდანვე როცა ჩვენება მივეცით. ისინი არ მონაწილეობდნენ და არც შაქარაშვილსა და არც იუბილარს არ იცნობდნენ" - აცხადებს ადვოკატი მურმან ღურწკაია.