ჯანდაცვის მინისტრის განცხადებით, როგორც საკანონმდებლო ბაზაში, ასევე რეგულირების და პროფესიული კომპეტენციის ნუსხაში საჭიროა ცვლილებები, რათა თბილისის ცენტრალურ საავადმყოფოს ექიმი, რომელიც დაკავებულია, იყოს უკანასკნელი ექიმი, რომელიც მსგავს გაუგებრობაში მოყვა.
"ცალსახად გამოიკვეთა, თუ რამდენი და რა მნიშვნელოვანი ცვლილებები არის საჭირო განხორციელდეს საკანონმდებლო ბაზაში და ასევე რეგულირების და პროფესიული კომპეტენციების ნუსხაში, იმისათვის, რომ ვახტანგ ყიფიანი იყოს ბოლო ექიმი, რომელიც მოხვდა იმ გარკვეულ გაუგებრობაში, სადაც მას დღესდღეობით ეწოდა თაღლითი ექიმის სახელი", - განაცხადა ტიკარაძემ .
მინისტრის განმარტებით, განსაზღვრული უნდა იყოს კომპეტენციები, რომელ ექიმს რა რეგულაციებით აქვს უფლება მიიღოს გარკვეული ტიპის პაციენტი და შესაბამისად, განახორციელოს გარკვეული ტიპის ჩარევს.
"საკანონდემბლო ბაზა არ იყო მზად იმისთვის, რომ ჩვენ განგვეხორციელებინა ბატონი ვახტანგ ყიფიანის კომპეტენციების ფარგლებში ის პროგრესული და თანამედროვე ჩარევა, რომელიც მან განახორციელა. მნიშვნელოვანია, რომ უმოკლეს ვადაში მომზადდეს ეს რეგულაცია იმისათვის, რომ სხვა ექიმებიც არ აღმოჩნდნენ მსგავს ვითარებაში", — აღნიშნა ტიკარაძემ.
მან ასევე თქვა, რომ სამინისტროს ჰქონდა მომზადებული კონკრეტული ცვლილებები, თუმცა პარლამენტში მსჯელობის შემდეგ ის უკან გამოიწვიეს. მინისტრის აზრით, შესაბამისი რეგულაციები უმოკლეს ვადაში უნდა მიიღონ.
კითხვაზე არის თუ არა დამნაშავე ექიმი, მინისტრი პასუხობს, რომ გარკვეული გადაცდომები იკვეთება, თუმცა "დანაშაულს გააჩნია თავისი სიმძიმე".
"ეს კონკრეტული შემთხვევა არის საკმაოდ კომპლექსური და რთული. 20 თვეა აქტიური გამოძიება მიმდინარეობს და არ მაქვს უფლება ვთქვა, იყო თუ არა დამნაშავე. აქ არის დანაშაულის სიმძიმეზე საუბარი. და სწორედ იქედან გამომდინარე, რომ რეგულაციები და საკანონმდებლო ბაზა არ არის სათანადოდ მომზადებული, რა თქმა უნდა, იკვეთება გარკვეული გადაცდომები, თუმცა დანაშაულს გააჩნია თავისი სიმძიმე", - განაცხადა ეკატერინე ტიკარაძემ.
მასალის გამოყენების პირობები