ჯანდაცვის მსოფლიო ორგანიზაციაში აცხადებენ, რომ „კოვიდ-19“-თან დაკავშირებით 14-დღიანი კარანტინი უნდა შენარჩუნდეს. ორგანიზაციაში ამბობენ, რომ რეკომენდაცია ემყარება ვირუსის ინკუბაციური პერიოდისა და გადაცემის მეცნიერულ ახსნას.

ორგანიზაციის ევროპის განყოფილების საგანგებო ვითარებათა უფროსი, კეთრინ სმოლვუდი ამბობს, რომ კარანტინის დღეების შემცირება დაუშვებელია, რადგან იზოლაციის 14 დღიანი ვადა ვირუსის ინკუბაციურ პერიოდისა და გადაცემის ალბათობას ემყარება.

WHO ევროპაში ბოლო პერიოდში ვირუსის გავრცელების მკვეთრ ზრდას სწორედ კარანტინის ვადების შემცირებას უკავშირებს.

შეგახსენებთ, მთავრობის დადგენილებით საქართველოში კარანტინის ვადა აგვისტოში 14-დან ჯერ 12 დღემდე, შემდეგ კი 8 დღემდე შემცირდა.