როგორც მიქელაძე აცხადებს, აღმოჩენილი შეუსაბამობა მათ გამოუყენებლობაზე მეტყველებდა. ჯანელიძემ გადაწყვიტა, რომ რუკების საკითხი პრემიერმინისტრამდე აღარ მიეტანა.

რაც შეეხება დაკავებულ კარტოგრაფებს, მათი ადვოკატების განცხადებით, საქმეში არსებული მოწმეთა ჩვენებები და გამოძიების მიერ გაჟღერებული ინფორმაცია გარკვეულ შეუსაბამობაზე მეტყველებს - ასე, მაგალითად, პროკურატურა აცხადებდა, რომ რუკა ნატალია ილიჩოვას კაბინეტში იქნა ამოღებული, რეალურად კი მას რუკებზე წვდომა 2019 წლის შემდეგ აღარ ჰქონია. რუკები გადაეცა ირმა გაბუნიას, რომელმაც კომისიაში ილიჩოვა შეცვალა. გამოდის, რომ მტკიცებულება გაბუნიას კაბინეტიდან ამოიღეს.

ასევე, არადამაჯერებელია დავით ხიდაშელის ჩვენება, რომლის მიხედვითაც მას დაუკავშირდა ბეჟან მაისურაძე და რუკების მოძიება სთხოვა, სატელევიზიო ინტერვიუში კი ხიდაშელი ამტკიცებს, რომ რუკების მოპოვება პირადად ივანიშვილმა დაავალა.

შეგახსენებთ, რომ საქართველო-აზერბაიჯანის დელიმიტაცია-დემარკაციის კომისიის წევრების, ივერი მელაშვილისა და ნატალია ილიჩოვას მიმართ სისხლის სამართლებრივი დევნა 7 ოქტომბერს დაიწყო. გამოძიება მათ საქართველოს საწინააღმდეგო მოქმედებას ედავება. პროკურატურა ამტკიცებს, რომ დაკავებულებმა საზღვარი ჩვენი ქვეყნის საზიანოდ მონიშნეს და "საქართველოს ტერიტორიის ნაწილი უცხო ქვეყანას გადასცეს".

დაკავებულების წინააღმდეგ გამოძიება საქართველოს სისხლის სამართლის კოდექსის 308-ე მუხლის პირველი ნაწილით მიმდინარეობს რაც 10-დან 15 წლამდე პატიმრობას ითვალისწინებს.

8 ოქტომბერს თბილისის საქალაქო სასამართლომ ორივე მათგანს აღკვეთის სახითმ, ორთვიანი წინასწარი პატიმრობა შეუფარდა.