სოფელ ბუკნარში რელიგიურ ნიადაგზე მომხდარ დაპირისპირებას არასამთავრობო ორგანიზაციები ეხმაურებიან და ხელისიფლებას მოუწოდენებ დროულად მოქმედებისკენ. ენჯეოების განცხადებით, მოქალაქეები, რომლებიც ადგილობრივ მუსლიმებს ლოცვას უშლიან, სახელმწიფოს პოლიტიკით არიან წახალისებულები:

"თუ ეს კონფლიქტი გაგრძელდა მან შეიძლება კიდევ უფრო მძიმე ფორმები მიიღოს. დიდი ყურადღების და პასუხისმგებლობის საგანი უნდა გახდეს მთავრობის მხრიდან, თუმცა, დღევანდელი რეაგირებები და განცხადებები სამწუხაროდ ამ პასუხისმგებლობის გააზრებას არ უჩვენებს", - განაცხადა "ადამიანის უფლებების სწავლებისა და მონიტორინგის ცენტრის" თანასწორობის პოლიტიკის პროგრამის დირექტორმა, თამთა მიქელაძემ.

"მოსახლეობა ახლა, რომელიც უპირისპირდება და ხელს უშლის ილოცონ, გარკვეულწილად წახალისებული არის სახელმწიფოს ამ პოლიტიკით და იმ განცხადებებით, თუნდაც, რომელსაც მაღალი თანამდებობის პირები აკეთებდნენ, რომ ჩვენ ვართ მართმადიდებლური სახელმწიფო, რომ უმცირესობებს არ აქვთ უფლებები და მხოლოდ უმრავლესობამ უნდა აღნიშნოს, მაგალითად: შობის დღესასწაული და ა.შ", - აღნიშნა ტოლერანტობისა და მრავალფეროვნების ინსტიტუტის გამგეობის წევრმა, მაკო ღავთაძემ.

შეგახსენებთ, რომ გუშინ ბუკნარში რელიგიურ ნიადაგზე დაპირისპირება მოხდა - ადილობრივი ქრისტიანული მრწამსის მოქალაქეები მუსლიმ თემს დაუპირისპირდნენ.