მგზავრები, რომელთა ნაწილმაც ბოლო თეთრები გადაიხადა პოლონეთში გასამგზავრებელ ბილეთში, თბილისის აეროპორტში დაბლოკეს

საზოგადოება - 17:03, 15 Jan, 2021

9333

ხმაური იყო გვიან ღამით თბილისის საერთაშორისო აეროპორტში, სადაცმესაზღვრეებმა საქართველოს მოქალაქეები პოლონეთში არ გაუშვეს. 60 პირი, რომელიც უკვე გასამგზავრებლად იყო მზად და თითმფრინავში უნდა ასულიყო, ადგილზევე დაბლოკეს. ფაქტს თბილისის საერთაშორისო აეროპორტში ხმაური მოჰყვა.
მესაზღვრეებმა თავდაპირველად განმარტეს, რომ პოლონეთმა მოულოდნელად ჩაკეტა საზღვარი, თუმცა მოგვიანებით აღნიშნეს, რომ საქართველოს მოქალაქეებს ქვეყანაში შესასვლელად ვიზა სჭირდებოდათ, მიუხედავად იმისა, რომ პოლონეთი შენგენის ზონაში შედი და საქართველოდან ჩასულებს ვიზის საჭიროება არ აქვთ.
ჩვეულებრივ, გავიარეთ რეგისტრაცია, კეთილი მგზავრობაც კი გვისურვა ავედით ზემოთ და გვეუბნებიან, რომ უვიზო მიმოსვლის ქვეყანაში საქართველოდან ვიზას ითხოვენ. ან უნდა გვქონოდა ვიზა, ან ბინადრობა, მხოლოდ ამ შემთხვევაში გაგვიშვებდნენ. ბოლოს გაუშვეს ის მგზავრები, რომლებიც ან პოლონეთის მოქალაქეები იყვნენ, ან ამ ქვეყნის ვიზა ჰქონდათ. ჩვენ ვითხოვდით, რომ ბილეთის საფასური მაინც დაებრუნებინათ, რადგან იქ იყვნენ ადამიანები, რომლებმაც ბოლო კაპიკები გადაიხადეს ბილეთში" - განაცხადა ერთ-ერთმა მგზავრმა ეკატერინე ბაციკაძემ.

ბაციკაძის თქმით, ავიაკომპანია "ბელავია" მგზავრობის საფასურის დაბრუნებას დაჰპირდა, თუმცა ჩამოაჭრის 50 ევროს. პოლონეთში გასამგზავრებელი ბილეთი 850 ლარი ღირდა, თუმცა კომპანიის წარმომადგენლები მას დაუკავშირდნენ და უთხრეს, რომ მხოლოდ 360 ლარს დაუბრუნებდნენ.
აქვე, უნდა აღინიშნოს, რომ 2021 წლის 1 იანვრიდან საქართველოს კანონმდებლობაში შევიდა ცვლილება, რომლის მიხედვითაც, საქართველოს მოქალაქეებს გაფრენის დროს საქართველოს მესაზღვრეებიც შეამოწმებენ და იმ შემთხვევაში, თუ ისინი ვერ წარმოადგენენ კონკრეტულ დოკუმენტაციას, ისინი ვეღარ გაფრინდებიან.