ბიძინა ივანიშვილის პოლიტიკიდან კიდევ ერთხელ წასვლას The Washington Post ვრცელ სტატიას უძღვნის .

სტატიის ავტორები ბიძინა ივანიშვილს აშშ-ს პრეზიდენტ დონალდ ტრამპს ადარებენ ისინი ივანიშვილს შავ ზღვასა და კავკასიის ქედებს შორის გადაჭიმული ქვეყნის დე ფაქტო მმართველად მოიხსენიებენ.

"64 წლის ოლიგარქი, ივანიშვილი აცხადებს, რომ ახლა ის ქველმოქმედებაზე ახდენს კონცენტრირებას. შთამაგონებელი ნარატივია – განსაკუთრებით მაშინ, როდესაც სხვა პოსტსაბჭოთა ქვეყნების ლიდერები ხშირად არ ნებდებიან ხელისუფლებას და იშვიათად მიდიან ნებაყოფლობით. პრობლემა ისაა, რომ ივანიშვილისა მხოლოდ რამდენიმე პოლიტიკურ ოპონენტს და რეგიონულ პოლიტიკურ ანალიტიკოსს სჯერა". –აღნიშნულია სტატიაში.

სტატიაში ლაპარაკია მოლოდინზე, რომ ივანიშვილი ქვეყნის მართვას კულისებიდან გააგრძელებს და ამ ნაბიჯით მას მხოლოდ პასუხისმგებლობის არიდება სურს, ვინაიდან ქვეყანაში მმართველ პარტიას გაძლიერებული ანტიდემოკრატიული მიდრეკილებები აქვს.

გავლენიანი გამოცემა ხაზს უსვამს აშშ-ს ოფიციალური წარმომადგენლების პრეტენზიებს ივანიშვილის მმართველობასთან დაკავშირებით, მათ შორის მოსკოვთან კავშირს იმ ქვეყნისთვის, რომელსაც NATO-ში გაწევრიანების ამბიცია აქვს. ლაპარაკია პარალელებზე რუსეთის პრეზიდენტ ვლადიმირ პუტინთან, რომელმაც გასულ წელს კანონმდებლობის შეცვლით შეძლო შესაძლებლობის შექმნა, რომ მმართველობა 2036-მდე შეინარჩუნოს, ასევე პარალელზე ბელარუსის პრეზიდენტ ლუკაშენკოსთანაც, რომლის მიერ "მოგებულ" ბოლო არჩევნებს გაყალბებულად მოიხსენიებენ.

The Washington Post-ის სტატიაში ნახსენებია 31 ოქტომბრის საპარლამენტო არჩევნები, რომელიც საერთაშორისო ორგანიზაცებმა კონკურენტულ და ფუნდამენტური უფლებების დაცვით ჩატარებულ არჩევნებად შეაფასეს, თუმცა ასევე საუბრობენ ამომრჩევლებზე ზეწოლისა და ქართული ოცნების მხრიდან ადმინისტრაციული რესურსის გამოყენების ბრალდებებზე. ყურადღება გამახვილებულია ოპოზიციურ სპექტრზე, რომელმაც არჩევნები გაყალბებულად მიიჩნია და უარი თქვა საპარლამენტო მანდატებზე.

გამოცემას მოჰყავს ექსპრეზიდენტ მიხეილ სააკაშვილის სიტყვებიც, რომელმაც The Washington Post-თან საუბარში ივანიშვილზე თქვა, "გრძნობს, რომ მის ქვეშ მიწა ირხევა, რადგან საქართველოს მოსახლეობის უმეტესობას სჯერა, რომ მან არჩევნები მოიპარა".