"ეს განცხადება დასტური იყო, რომ პატიმრობის მოთხოვნა იყო დაუსაბუთებელი" ,- ასე ეხმაურება სახალხო დამცველი, ნინო ლომარია პროკურატურის მიერ ნიკა მელიასთვის შეთავაზებულ გირაოს.

ომბუდსმენის განცხადებით, ნიკა მელიას საპატიმროს გარეთ ყოფნა არანაირ საფრთხეს არ უქმნის გამოძიების წარმართვას და მიიჩნევს, რომ სწორედ ამ კუთხით დასაბუთება აკლდა პროკურატურის პოზიციას სასამართლო პროცესზე.

"პროკურატურის განცხადება ადასტურებს, რომ რეალურად ისინი თვლიან, რომ მელიას პატიმრობაში ყოფნა არაა საჭირო გამოძიების წარმართვისთვის. თუ ნიკა იქნება გარეთ და გადაიხდის გირაოს, შესაძლებელი იქნება საქმეზე ობიექტური გამოძიების წარმოება. ესეიგი ისინი თვლიან, რომ ნიკა შეიძლება ყოფილიყო გარეთ. ეს იყო ომბუდსმენის არგუმენტი, რომ პროკურატურამ ვერ დაასაბუთა, რა საჭიროებით იყო განპირობებული, როგორ შეეშლებოდა ხელი მართლმსაჯულებას ნიკა მელიას გარეთ ყოფნით. ეს განცხადება დასტური იყო, რომ პატიმრობის მოთხოვნა იყო დაუსაბუთებელი", - განაცხადა ნინო ლომჯარიამ.

შეგახსენებთ, რომ პროკურორმა ამირან გულუაშვილმა დღეს გამართულ ბრიფინგზე განაცხადა, რომ თუ პროკურატურა მზადაა, ნიკა მელიას მიერ გირაოს გადახდის შემთხვევაში, სასამართლოს აღკვეთის ღონისძიების სახით პატიმრობის შეცვლის შუამდგომლობით მიმართოს.