საგარეო საქმეთა მინისტრმა, დავით ზალკალიანმა, ევროპული საბჭოს პრეზიდენტის , შარლ მიშელის, ვიზიტის მნიშვნელობაზე ისაუბრა და განაცხადა, რომ შარლ მიშელი მიემგზავრება საოკუპაციო ხაზთან და ის კიდევ ერთხელ დარწმუნდება იმ უკანონო ქმედებებში, რომელსაც რუსეთი საქართველოს ოკუპირებულ ტერიტორიებზე ახორციელებს.

"ევროკავშირის საბჭოს პრეზიდენტის საქართველოში ვიზიტი მნიშნველოვანია იმ ფონზე, რა განვითარებაც გვაქვს რეგიონში. განსაკუთრებით, გეოპოლიტიკური ვითარების შეფასების თვალსაზრისით. ასევე ჩვენი მჭიდრო კოორდინაციის კუთხითაც. ერთ-ერთი მნიშვნელოვანი განსახილველი თემა იქნება ეს. ასევე ოკუპირებულ ტერიტორიებზე შექმნილი სიტუაცია.

მნიშნველოვანია, რომ პრეზიდენტი მიემგზავრება და საკუთარი თვალით მოინახულებს საოკუპაციო ხაზს. ვფიქრობ, რომ ის კიდევ ერთხელ დარწმუნდება იმ უკანონო ქმედებებში, რომელსაც რუსეთის ფედერაცია ოკუპირებულ ტერიტორიებზე ახორციელებს.

მნიშნველოვანია აღინიშნოს, რომ ევროკავშირის უმაღლესი წარმომადგენლის ჟოზეფ ბორელის მოსკოვში ვიზიტის შემდეგ, სადაც რუსეთის ხელისუფლებასთან მაღალ დონეზე იყო დაყენებული ოკუპირებული ტერიტორიების საკითხი, ძალიან მნიშნველოვანია ამ ფონზე ევროკავშირის საბჭოს პრეზიდენტის საქართველოში ვიზიტი“, - განაცხადა ზალკალიანმა.