ენმ-ს წევრის ხატია დეკანოიძის განცხადებით, ოპოზიციისთვის მნიშვნელოვანი და პრინციპული საკითხია ნიკა მელიას გამოშვება, რომელიც შემდეგ შეხვედრაზე მოლაპარაკების მაგიდასთან იქნება. მისი თქმით, ოპოზიციური პარტიის თავმჯდომარე ციხეში, ძალიან მძიმე განაჩენია ქვეყნის მომავლისთვის.
„ჩვენ არავითარი წინგადმოდგმული ნაბიჯი „ქართული ოცნებისგან“ არ ვიცით, გარდა გუშინდელი შეხვედრისა, როდესაც მზადყოფნა გამოთქვეს, რომ შეგვხვდებოდნენ ბატონ მიშელთან ერთად. დანარჩენი ვნახოთ, მოვლენები როგორ განვითარდება. ჩვენ გავაგრძელებთ იმ გეგმას, რომელიც დავაანონსეთ, მათ შორის, ეს იქნება აქცია მთავრობის ადმინისტრაციასთან. 13-შიც იქნება დიდი აქცია.
რაც შეეხება გუშინ ჩამოყალიბებულ დოკუმენტს, ძალიან მნიშვნელოვანია, რომ მასში არის ნიკა მელიას და გიორგი რურუას გათავისუფლება, პოლიტიკური დევნის შეწყვეტა და რიგგარეშე არჩევნები. ეს არის უმნიშვნელოვანესი. ჩვენთვის ყველაზე პრინციპული და მნიშვნელოვანი საკითხია, რომ შემდეგ მოლაპარაკებებზე ნიკა მელია იჯდეს მოლაპარაკების მაგიდასთან. ეს იყო ჩვენი პრინციპული პოზიცია გუშინ. ოპოზიციური პარტიის თავმჯდომარე ციხეში, ეს არის ძალიან მძიმე განაჩენი ჩვენი ქვეყნის მომავლისთვის“, - განაცხადა დეკანოიძემ.
რაც შეეხება პარლამენტის მიმდებარე ტერიტორიაზე განვითარებულ მოვლენებს და სამოქალაქო აქტივისტების ნაწილის ადმინისტრაციული წესით დაკავებას, როგორც დეკანოიძე აცხადებს, „პროტესტისთვის ადამიანების დაკავება და ამდენი პოლიციელის მოცდენა არის წარმოუდგენელი“. „ჩვეულებრივად ეს არის ყველგვარი სამართლებრივი ჩარჩოს მიღმა“, - განაცხადა დეკანოიძემ.
მასალის გამოყენების პირობები