დაავადებათა კონტროლისა ეროვნული ცენტრის ხელმძღვანელის ამირან გამყრელიძის ინფორმაციით, საქართველოში შემთხვევათა 50-60%-ში ე.წ. ბრიტანული შტამი ცირკულირებს. მისივე თქმით, მთელს ევროპაში ბრიტანული შტამის 90%-ია ცირკულირებაში:

„მთლიანად ევროპაში დღეს, დაახლოებით, 90% ცირკულირებს „ბრიტანული შტამი“ და მათ შორის, საქართველოს პროგნოზირება რომ კეთდება, უკვე 50-60%-ს ზემოთ ჩვენთან ცირკულირებს ე.წ. ბრიტანული შტამი,“- განაცხადა გამყრელიძემ.

როგორც გამყრელიძის მოადგილე პაატა იმნაძე აცხადებს, ბრიტანული შტამი დანარჩენი შტამებისგან იმით განსხვავდება, რომ გაცილებით უფრო სწრაფად ვრცელდება, თუმცა, მისი თქმით, ქვეყანაში საბედნიეროდ, არ არის სხვა შტამები, რომლებიც ორმაგი მუტაციით იწყებს გავრცელებას:

„პრაქტიკულად, „ბრიტანულ შტამზე“ ზედამხედველობას აზრი აქვს ხოლმე დასაწყის პერიოდში, როდესაც იწყება მისი ცირკულაცია, როდესაც უნდა გავარჩიოთ ეს არის ბრიტანული თუ ჩვეულებრივი შტამი. ძალიან კარგად ვიცით სხვა ქვეყნების გამოცდილება და მისი განსხვავება სწორედ ის არის, რომ ის ძალიან სწრაფად და უფრო ადვილად გადადის, გადამდებლობა უფრო მეტი აქვს, ვიდრე ჩვეულებრივ, მანამდე ცირკულირებად შტამებს ჰქონდათ. ახლაც ლუგარის ცენტრში მიმდინარეობს მუშაობა იმისთვის, რომ განსხვავებები დავიჭიროთ. „ბრიტანული შტამი“ ნახევარზე მეტია, ამიტომაც ხდება ასეთი სწრაფი გავრცელება სხვა მიზეზებთან ერთად და ეს კვლევები მუდმივად გრძელდება. ჯერჯერობით, საბედნიეროდ, ქვეყანაში მარტო ე.წ. ბრიტანული შტამის გავრცელებაა დადასტურებული, იქ არის სხვა შტამებიც იგივე ბრაზილიური, სამხრეთ აფრიკული, ინდური შტამები გაჩნდა ახალი, ორმაგი მუტაცებით, ამიტომ ეს მუშაობა მუდმივად მიმდინარეობს ლუგარის ცენტრში,“- განაცხადა პაატა იმნაძემ.