ფრაქცია "ერთიანი ნაციონალური მოძრაობა - ძალა ერთობაშია" სასამართლოებში კლანურ მმართველობასთან დაკავშირებით პარლამენტს საგამოძიებო კომისიის შექმნისკენ მოუწოდებს. ფრაქციის თავმჯდომარის ხატია დეკანოიძის განცხადებით, ხელისუფლება მიშელის დოკუმენტის პირობებს არღვევს და სასამართლო რეფორმის გატარებამდე მოსამართლეების უვადოდ დანიშნვის პროცესს უწყობს ხელს.
დეკანოიძის განმარტებით, კომისიამ უნდა შეისწავლოს სასამართლოს პოლიტიკური გადაწყვეტილებები, მოსამართლეთა დანიშნვის საკითხები და გამოიკვლიოს კავშირები, ანგარიში კი საერთაშორისო პარტნიორებს გადაეგზავნებათ:
"მთელი ცივილიზებული სამყარო, ისევე როგორც საქართველოს საზოგადოება, უმძიმეს შეფასებას აძლევს საქართველოს სასამართლო სისტემაში არსებულ ვითარებას. ამერიკის სენატის უმაღლესი ტრიბუნიდან, ყველა საერთაშორისო ტრიბუნიდან ხაზგასმულია, რომ საქართველოში მოქმედებს და თავხედურად პოლიტიკურ მართლმსაჯულებას ეწევა კლანი, და ეს კლანი ძირს უთხრის არა მარტო საქართველოს მართლმსაჯულებას, არამედ ეს კლანი მოქმედებს უარყოფითად საქართველოში დემოკრატიის განვითარებაზე. ეს პირდაპირ კავშირშია იმასთან, რომ საქართველოში არ შემოდის ინვესტიციები, თავისუფალ ბიზნესს არა აქვს თავისუფალი სასამართლოს იმედი და ადამიანებს დაკარგული აქვთ ყველანაირი იმედი, რომელმაც უნდა დაიცვას მათი უფლებები.
საქართველოში არსებული კლანური სასამართლო სისტემა მიწებებულია ხელისუფლებასთან და კომფორტულად გრძნობს თავს.
სასამართლო სისტემა არა მხოლოდ კრიტიკას ვერ უძლებს, არამედ საგანგაშო ნიშნულს უახლოვდება, როცა ,,ოცნება" არღვევს იმ შეთანხმებას, რომელსაც თვითონ მოაწერა ხელი" - აცხადებს ხატია დეკანოიძე.
მასალის გამოყენების პირობები