"ეს არავის შერჩება!" - ხატია დეკანოიძე ნუგზარ ფუტკარაძის გარდაცვალების საქმეზე გამოძიების დაწყებას მოითხოვს

,,საქმე გვაქვს რეჟიმის, იმდენად საზიზღარი, მახინჯი სისტემის რეპრესიულ მექანიზმთან, როდესაც არჩევნების შემდეგ პოლიტიკური ძალაუფლებისთვის რეჟიმი არ ერიდება ადამიანების შანტაჟს, მუქარას, მათ ყველაზე უფრო მძიმე სიბინძურეში გახვევას" - ,,ნაციონალური მოძრაობის" ერთ-ერთი ლიდერის ხატია დეკანოიძის განცხადებით, ბათუმის საკრებულოს ენმ-ს წევრის ნუგზარ ფუტკარაძის გარდაცვალების საქმესთან დაკავშირებით შესაბამისმა უწყებებმა გამოძიება უნდა დაიწყონ. 

,,საქმე გვაქვს რეჟიმის, იმდენად საზიზღარი, მახინჯი სისტემის რეპრესიულ მექანიზმთან, როდესაც არჩევნების შემდეგ პოლიტიკური ძალაუფლებისთვის რეჟიმი არ ერიდება ადამიანების შანტაჟს, მუქარას, მათ ყველაზე უფრო მძიმე სიბინძურეში გახვევას და შედეგად ვიღებთ იმას, რომ ადამიანი, ბათუმის საკრებულოს დეპუტატი, დღეს უბრალოდ აღარ არის. ჩვენ უნდა ვისაუბროთ და ყველაფერი გავაკეთოთ იმისთვის, რომ რეჟიმმა ვეღარ გაბედოს ადამიანების შანტაჟი წინასაარჩევნოდ თუ არჩევნების შემდეგ...

დაუყოვნებლივ დაიწყოს გამოძიება ბატონი ნუგზარის გარდაცვალების გამო, საგამოძიებო ორგანოების მიერ დაუყოვნებლივ იქნას მხილებული ყველა ის პირი, რომელიც მონაწილეობდა შანტაჟსა და მოსყიდვაში, დაუყოვნებლივ მოხდეს რეაგირება ყველა იმ ინსტიტუტის მიერ, რომელსაც რეალურად ევალება რომ გამოიძიოს, დაადგინოს ის ყველაფერი, რამაც გამოიწვია ადამიანის გარდაცვალების ფაქტი.​ დარწმუნებული იყავით, ეს არავის შერჩება!", - განაცხადა დეკანოიძემ. 

შეგახსენებთ, ,,ნაციონალური მოძრაობის" ბათუმის ორგანიზაციის წარმომადგენლებმა დღეს 24 ნოემბერს გამოაქვეყნეს ჩანაწერი, რომლითაც დგინდება, რომ რამდენიმე დღის წინ გარდაცვლილ ნუგზარ ფუტკარაძეს ,,ქართულ ოცნებასთან" დაახლოებული პირები აშანტაჟებდნენ და მას ენმ-ს დატოვებას თხოვდნენ.