"წაგებულია ის, ვინც ოპოზიციის ერთობას წაგებულ თამაშს უწოდებს, ნიკა ფიქრობს გაერთიანებაზე და არა გაყოფაზე" - ბაჩუკი ქარდავა ნიკა მელიასთან საუბრის დეტალებზე

პოლიტიკა - 15:15, 07 May, 2021

1124

რუსთავის მე-12 სასჯელაღსრულების დაწესებულებაში ენმ-ს დაპატიმრებულ თავმჯდომარეს ნიკა მელიას ეროვნულ-დემოკრატიული პარტიის ლიდერი ბაჩუკი ქარდავა შეხვდა, რომელმაც ჟურნალისტებთან იმ საკითხებზე ისაუბრა, რომელიც პატიმრობაში მყოფ ოპოზიციის ლიდერთან ერთად განიხილეს.
როგორც ედპ-ს ლიდერმა აღნიშნა, ნიკა მელია აქტიურად არის ჩართული პროცესებში და მისი მთავარი მიზანი ოპოზიციური ერთობის შენარჩუნებაა, რაც ივანიშვილის რეჟიმის დასამარცხებლად მნიშვნელოვანი იარაღია:

"დავიწყოთ პირველ რიგში იქიდან, რომ ჩვენი აქ შეხვედრა, უკვე სირცხვილია ჩვენი სახელმწიფოსთვის და ეს სირცხვილი სახელმწიფოს ბიძინა ივანიშვილმა მოუტანა, როდესაც ნიკა მელიას რანგის პოლიტიკური პატიმარი ჰყავს ამ ქვეყანას. ეს პოლიტიკური პატიმარი გამოსყიდვის გზით უნდა დაიხსნას ევროპამ, დასავლურმა დემოკრატიულმა საზოგადოებამ. ეს ძალიან დიდი დარტყმაა ქართულ სახელმწიფოებრიობაზე და ამას ქართველი ერი კიდევ გადაიტანს იმიტომ, რომ საქართველოში არიან ისეთი ადამიანები, რომლებსაც პრინციპული ბრძოლა შეუძლიათ, როგორიცაა ნიკა მელია.

ივანიშვილის ამოცანა, რომ ნიკა იმყოფება დღეს აქ, ემსახურება იმას, რომ პოლიტიკიდან მისი იზოლაცია და გარიყვა მომხდარიყო. ნიკას შეუვალობა, პრინციპულობა და ბრძოლისუნარიანობა ივანიშვილისთვის პრობლემა იყო. ამის მიუხედავად, დღეს ნიკა მელია აქტიურად არის ჩართული პროცესებში, მას აქვს გეგმა უახლოესი პოლიტიკური ამოცანების დასაძლევად, ის წარსულს აანალიზებს, მაგრამ მხოლოდ და მხოლოდ წარსულზე არ ფიქრობს, განიხილავს სამომავლო გეგმებს.

გვქონდა კონკრეტულ თემებზე საუბარი და ეს შეხვედრა არ იქნება ერთჯერადი. თუ ბიძინა ივანიშვილი კიდევ დიდი ხანი არ გაათავისუფლებს ნიკა მელიას, შევხვდებით ხოლმე არა მის კაბინეტში, არამედ ციხეში" - განაცხადა ქარდავამ.
როგორც მან ჟურნალისტებს უთხრა, საუბარი ეხებოდა უახლოეს პოლიტიკურ ამოცანებს და ოპოზიციის ერთობის აუცილებლობას, მათ შორის ადგილობრივ არჩევნებს, რომელიც ედპ-ის ლიდერის თქმით, "ამ ხელისუფლებისთვის უნდა იქცეს რეფერენდუმად".
"მთავარი საკითხი, რაზეც ნიკამ გაამახვილა ყურადღება, ეს არის ოპოზიციის ერთობის შენარჩუნება. ერთობას ვინც წაგებულ თამაშს უწოდებს, სწორედ ის არის ამ შემთხვევაში წაგებული. ნიკა ფიქრობს ოპოზიციის გაერთიანებაზე და არა მის გაყოფაზე.

რაც შეეხება ადგილობრივ არჩევნებში საერთო კანდიდატის წარდგენას, ნიკას პოზიცია ასეთია - ამ არჩევნებში ასარჩევია სხვადასხვა რანგის პირები - საკრებულოს წევრები, დიდი ქალაქის მერები, მარტო ერთი ქალაქის გარშემო არ მიმდინარეობს პროცესები. ის უფრო ფართოდ და ვრცალდ უყურებს ამ საკითხს" - განაცხადა ბაჩუკი ქარდავამ.
"წაგებულია ის, ვინც ოპოზიციის ერთობას წაგებულ თამაშს უწოდებს, ნიკა ფიქრობს გაერთიანებაზე და არა გაყოფაზე" - ბაჩუკი ქარდავა ნიკა მელიასთან საუბრის დეტალებზე