ჟურნალისტური ეთიკის ქარტია მთავარი არხის ჟრნალისტზე მეუფე ანტონის მხრიდან თავდასხმის ფაქტს ეხმაურება.

ქარტიის მიერ გავრცელებულ განცხადებაში ნათქვამია, ეს ფაქტი სასულიერო პირების მხრიდან ჟურნალისტებისთვის პროფესიულ საქმიანობაში ხელის შეშლისა და ძალადობის პირველი შემთხვევა არ არის. ქარტია სამართალდამცველი ორგანოების მხრიდან მომხდარის დროულად გამოძიებას მოითხოვს:

"საქართველოს ჟურნალისტური ეთიკის ქარტია მკაცრად გმობს „მთავარი არხის“ თანამშრომელზე განხორციელებულ ძალადობას. ქარტია ითხოვს სამართალდამცავი ორგანოებისგან სწრაფად და ეფექტიანად გამოიძიონ ეს შემთხვევა და დადგეს კონკრეტულ პირთა პასუხისმგებლობის საკითხი. ეს სასულიერო პირების მხრიდან ჟურნალისტებისთვის პროფესიულ საქმიანობაში ხელის შეშლისა და ძალადობის პირველი შემთხვევა არ არის.

ქარტია მიიჩნევს, რომ სამართალდამცავი უწყების მხრიდან მსგავსი ფაქტების მკაცრი რეაგირების გარეშე დატოვება, ამგვარ ძალადობასა და ჟურნალისტების მუშაობაში ხელის შეშლის შემთხვევებს ახალისებს, რაც მედიაგარემოსთვის ძალიან დამაზიანებელია. თითოეულ ჟურნალისტს უნდა ჰქონდეს პროფესიული საქმიანობის თავისუფლად განხორციელების საშუალება. მათ უნდა იცოდნენ, რომ ყველა შესაბამისი ინციდენტი იქნება ადეკვატურად და გამჭვირვალედ გამოძიებული, დამნაშავე პირებს კი დაეკისრებათ პასუხისმგებლობა", - ნათქვამია განცხადებაში.

შეგახსენებთ, გუშინ მიტროპოლიტი ანტონი მთავარი არხის ჟურნალისტს ირაკლი ვაჩბერიძეს თავს დაესხა და ხელი დაარტყა.