ადამიანის უფლებათა ევროპულმა სასამართლომ "ერთიანი ნაციონალური მოძრაობის" თავმჯდომარის ნიკა მელიას დაპატიმრების საქმეზე კომუნიკაციას დაიწყო.
ნიკა მელიას ინტერესების დამცველი დიმიტრი საძაგლიშვილი აღნიშნავს, რომ საჩივრის შეტანიდან საკმაოდ მოკლე ვადებში, ადამიანის უფლებათა ევროპულმა სასამართლომ, კითხვები საქართველოს ხელისუფლებას გამოუგზავნა.
"კითხვებში ასახულია ყველა ის საკითხი, რაზეც ყურადღებას ვამახვილებდით ადვოკატები საჩივარში. აგრეთვე მნიშვნელოვანია, რომ ამ კითხვებში ევროპული სასამართლო საქართველოს ხელისუფლებას ეკითხება, რამდენად არსებობდა კონვენციით გათვალისწინებული დაპატიმრების საფუძვლები და ამ კონტექსტში ახსენებს საქმეებს "ტიმოშენკო უკრაინის წინააღმდეგ" და "ნავალნი რუსეთის წინააღმდეგ".
მნიშვნელოვანი საკითხი არის ის, რომ სტრასბურგის სასამართლო კითხვას სვამს მე-18 მუხლის შესაძლო დარღვევასთან დაკავშირებით. მოგეხსენებათ, რომ ამ მუხლის არსი მდგომარეობს შემდეგში - მართლმსაჯულების გამოყენება არალეგიტიმური მიზნებისთვის. როგორც წესი, პოლიტიკური დევნის და პოლიტიკური პატიმრების საქმეებში, სწორედ, მე-18 მუხლის დარღვევას ადგენს ადამიანის უფლებათა ევროპული სასამართლო. ძალიან და ძალიან იშვიათად აკეთებს ამას" - აღნიშნავს საძაგლიშვილი.
შეგახსენებთ, რომ ნიკა მელია 23 თებერვალს, ენმ-ის მთავარ ოფისში ჩატარებული სპეცოპერაციის შედეგად დააპატიმრეს. მან ციხე 10 მაისს, ევროკავშირის მხრიდან გირაოს გადახდის შემდგომ დატოვა.
მასალის გამოყენების პირობები