ევროპარლამენტარი კრისტიან დანიელსონი, რომელიც საქართველოში მედიაციის პროცესში ევროპული საბჭოს პრეზიდენტის, შარლ მიშელის სპეციალური წარმომადგენელი იყო, აცხადებს, რომ 19 აპრილის შეთანხმება საქართველოს დემოკრატიის პროცესზე ხანგრძლივ გავლენას იქონიებს.
დანიელსონის შეფასებით, საქართველოს ახლა აქვს შანსი რომ ჩამოაყალიბოს პროგრესული საპარლამენტო მოდელი და მისივე თქმით, ევროკავშირი ამ ყველაფერში, ისევე როგორც კოვიდპანდემიის დაძლევასა და ეკონომიკის აღდგენაში, აუცილებლად დაეხმარება საქართველოს.
"19 აპრილის შეთანხმებაში არის რამდენიმე პუნქტი, რომელსაც ხანგრძლივი გავლენა ექნება საქართველოს დემოკრატიაზე. მოკლე პერსპექტივაში უნდა მოხდეს შეთანხმება ამნისტიის კანონზე. პარალელურად უნდა განხორციელდეს საარჩევნო ცვლილება, რომელიც მზად იქნება შემოდგომის ადგილობრივი არჩევნებისთვის.
მართლმსაჯულების რეფორმა არანაკლებ მნიშვნელოვანია, არ არსებობს დემოკრატია ჭეშმარიტი კანონის უზენაესობის გარეშე. 19 აპრილის შეთანხმება იძლევა კარგ საფუძველს, რომ ამ პროცესმა წინ წაიწიოს. საქართველოს ახლა აქვს შანსი რომ ჩამოაყალიბოს პროგრესული საპარლამენტო მოდელი. ევროკავშირი ამ ყველაფერში, ისევე როგორც კოვიდპანდემიის დაძლევასა და ეკონომიკის აღდგენაში, აუცილებლად დაეხმარება საქართველოს, მაგრამ ეს დახმარება არ იქნება უპირობო და დამოკიდებული იქნება საქართველოს მიერ რეფორმების გატარებაზე, - განაცხადა დანიელსონმა.
შეგახსენებთ, რომ 19 აპრილს მმართველმა გუნდმა და ოპოზიციის ნაწილმა შარლ მიშელის მირ წარმოდგენილ საბოლოო დოკუმენტს ხელი მოაწერეს.
მასალის გამოყენების პირობები