კიევში გაუჩინარებული ბელარუსი ოპოზიციონერი აქტივისტი ვიტალი შიშოვი უკრაინის დედაქალაქში, ერთ-ერთ პარკში ჩამომხვრჩვალი იპოვნეს.

ბელარუსი აქტივისტი კიევში ორგანიზაციას "ბელარუსიის სახლი უკრაინაში" ხელმძღვანელობდა. ორგანიზაციის მიზანი იმ ადამიანების დახმარება არის, რომელიც ბელარუსიის მთავრობის მხრიდან რეპრესიების მსხვერპლი იყო.

ორგანიზაციამ გაავრცელა კიდეც განცხადება, რომელშიც ნათქვამია, რომ ვიტალი შიშოვს უთვალთვალებდნენ, ხოლო წყაროები აფრთხილებდნენ, რომ მისი მკვლელობა მზადდებოდა.

ვიტალი შიშოვის დაკარგვის შესახებ მისმა მეგობარმა პოლიციას 2 აგვისტოს მიმართა. კოლეგების თქმით, ორშაბათს შიშოვი სავარჯიშოდ გავიდა და მას შემდეგ აღარ დაბრუნებულა. მეგობრების მტკიცებით, აქტივისტს უცხო პირი აედევნა, რის შემდეგაც აღარავის უნახავს.