კორონავირუსის მესამე ტალღის დაწყების ფონზე "თბილისის სითი მედიქალში" მყოფი პაციენტები და მედპერსონალი კლინიკაში არსებულ პრობლემებზე ალაპარაკდნენ. როგორც ისინი აცხადებენ, სამედიცინო დაწესებულებაში მედიკამენტების დეფიციტია, პერსონალი კი იძულებული ხდება, შემცვლელი წამლები გამოიყენოს.
კლინიკის ხელმძღვანელობა აღნიშნულ ბრალდებებს უარყოფს, ცოტა ხნის წინ კი სამედიცინო დაწესებულებაში რეგულირების სააგენტოს წარმომადგენლები შევიდნენ.
"ყველამ რეაგირება გავაკეთეთ, ვინც ვიყავით პალატაში, არა მხოლოდ მე, სხვებმაც დარეკეს, არ ჰქონდათ წამლების მარაგი, მოვითხოვეთ ჯანდაცვიდან, რომ ეს მარაგი ყოფილიყო. ისინი დაინტერესდნენ ვინ გასცა ეს ინფორმაცია. გეპარინი არ იყო, ანტიბიოტიკი შეგვიცვალეს ახლით, იმიტომ, რომ ძველი არ იყო, მე როგორც ალერგიული ადამიანი, გაღიზიანების ვარიანტები მაქვს და მძიმე მდგომარეობაში მაგდებს, ამიტომ შევშფოთდი", - განაცხადა ერთ-ერთმა პაციენტმა.
რაც შეეხება მედპერსონალს, ისინი აცხადებენ, რომ ხელმძღვანელობას მათთვის დაახლოებით სამი თვეა, ხელფასი არ მიუცია. კლინიკის დირექტორის მოადგილის განმარტებით, სამედიცინო დაწესებულებაში მედიკამენტებიც არის და მედპერსონალს ხელფასი სულ რამდენიმე დღით დაუგვიანდა:
"მედიკამენტების პრობლემა არ ყოფილა ნამდვილად, სულ 5 დღის გადასულები ვართ კოვიდზე და შესაბამისად არაფრის პრობლემა არ გვაქვს, ჯერჯერობით, ჯვარი გვეწეროს.
ხელფასებზე რამდენიმე დღე შეიძლება არის გადაცდენა, 5 აპრილს გაიცა ხელფასები, წესით 5 მაისს უნდა გაცემულიყო, ეტყობა დასვენების დღეების გამო გაჭირდა ცოტა გადმორციხვები, რამდენიმე დღეში ველოდებით" - განაცხადა კლინიკის დირექტორის მოადგილემ.
მასალის გამოყენების პირობები