არასამთავრობო ორგანიზაცია, "ტოლერანტობისა და მრავალფეროვნების ინსტიტუტი" (TDI) "მთავარი არხის" ჟურნალისტზე ირაკლი ვაჩიბერიძეზე მიტროპოლიტ ანტონის თავდასხმის ფაქტს ეხმაურება.

როგორც ორგანიზაციის მიერ გავრცელებულ განცხადებაშია ნათქვამი, სასულიერო პირების მხრიდან ჟრნალისტებზე ძალადობის გახშირებულმა ფაქტებმა საგანგაშო ხასიათი მიიღო, საპატრიარქოს კი არც ერთ ძალადობრივ ფაქტზე ბოდიში არ მოუხდია, არც ხელისუფლებას მიუმართავს შესაბამისი ღონისძიებებისთვის. ორგანიზაცია მოუწოდებს შინაგან საქმეთა სამინისტროს, მომხდარი ფაქტები დროულად გამოიძიოს:

"TDI მიიჩნევს, რომ მართლმადიდებელი ეკლესიის სასულიერო პირების ძალადობრივმა ქმედებებმა და ჟურნალისტებზე თავდასხმამ საგანგაშო ხასიათი მიიღო.

საქართველოს საპატრიარქოს არცერთი ძალადობრივი ქმედება არ დაუგმია და საჯაროდ ბოდიში არ მოუხდია საზოგადოების წინაშე. ხელისუფლება კი თვალს ხუჭავს მართლმადიდებელი ეკლესიის წარმომადგენლების მიერ ჩადენილ ძალადობასა და ჟურნალისტური საქმიანობისათვის ხელშეშლის ფაქტებზე. დღემდე არ გვინახავს, ეკლესიის სასულიერო პირებს პასუხი ეგოთ ჩადენილი ძალადობისთვის.

გავლენიანი სასულიერო პირების ქმედებები ასაზრდოებს და აქეზებს საზოგადოებაში სიძულვილს და ძალადობას.

მოვუწოდებთ საქართველოს შინაგან საქმეთა სამინისტროს, დაუყოვნებლივ გამოიძიოს 7 მაისს მთავარი არხის ჟურნალისტ ირაკლი ვაჩიბერაძეზე ვანი-ბაღდათის ეპარქიის მმართველის, მიტროპოლიტ ანტონ ბულუხიას მიერ ძალადობისა და ჟურნალისტური საქმიანობის განხორციელებაში ხელშეშლის ფაქტი; ასევე, 4 მაისს დავითგარეჯის სამონასტრო კომპლექსის მიმდებარედ მთავარი არხის ჯგუფზე ძალადობის შემთხვევა.

მოვუწოდებთ საქართველოს საპატრიარქოს, გაიაზროს საკუთარი, როგორც რელიგიური ინსტიტუციის როლი და აღკვეთოს სასულიერო პირების ძალადობა, ჟურნალისტებზე თავდასხმა და საზოგადოებაში სიძულვილის გაღვივება", - ნათქვამია განცხადებაში.

შეგახსენებთ, მთავარი არხის ჟურნალისტს ირაკლი ვაჩიბერაძეს გადაღების დროს ვანისა და ბაღდათის მიტროპილიტმა მეუფე ანტონმა ჯერ სიტყვიერი შეურაცხყოფა მიაყენა, დაემუქრა, შემდეგ კი ფიზიკურად გაიწია მასზე.