დავით გოგინაშვილი: „მჯერა, რომ ვაქცინა გვიცავს და აუცილებლად ერთად უნდა დავამარცხოთ პანდემია"

„ისტორიულად ასეა, რომ ვაქცინაციამ გადაარჩინა კაცობრიობა მრავალი საშიში ინფექციისგან“,- „თეგეტა ჯგუფის“ მარკეტინგის აღმასრულებელი დირექტორი დავით გოგინაშვილი სოციალურ ქსელში აღნიშნავს, რომ ვაქცინაცია ერთადერთი გზაა პანდემიის დასრულებისა და ცხოვრების ჩვეულ რიტმში დასაბრუნებლად. როგორც იგი ამბობს, პანდემიასთან ბრძოლისას საზოგადოების თითოეულმა წევრმა საკუთარი წილი პასუხისმგებლობა უნდა გაიაზროს. თავადაც სწორედ ამიტომ აიცრა. 

„გულწრფელად არც კი ვიცი, რა უნდა ვთქვა იმაზე მეტი, რასაც მსოფლიოს წამყვანი მეცნიერები და ექიმები გვირჩევენ.

გაიკეთებს თუ არა ვაქცინას ადამიანი, ეს, რასაკვირველია, მისი გადასაწყვეტია და მე მხოლოდ ჩემი მოსაზრების გაზიარება შემიძლია.

ყველამ ვიცით, ყოველ შემთხვევაში, ისტორიულად ასეა, რომ ვაქცინაციამ გადაარჩინა კაცობრიობა მრავალი საშიში ინფექციისგან და ამის ჩამოთვლას ახლა არ ვაპირებ.

თუმცა ხომ ფაქტია, არა, რომ ჩვენ აღარ ვიღუპებით ყბაყურისგან, წითელასგან, ჩუტყვავილასგან, დიფტერიისგან, პოლიომიელიტისგან და მრავალი სხვა ინფექცია-ვირუსისგან.

მჯერა, რომ ვაქცინა გვიცავს და აუცილებლად ერთად უნდა დავამარცხოთ პანდემია! რატომ ავიცერი? ჩემი აზრით, ყველამ უნდა გავიაზროთ ჩვენი წილი პასუხისმგებლობა პანდემიასთან ბრძოლის წინააღმდეგ! 

...და არამც და არამც ეს მოწოდება არაა, მეგობრებო! ეს მხოლოდ ჩემი, როგორც ცალკე აღებული ინდივიდის და საზოგადოების წევრის აზრია და მორჩა!

უნდა გავერთიანდეთ, რათა დროულად დავუბრუნდეთ ჩვეულ ცხოვრებას და ისევ ვიმოგზაუროთ, ისევ სრულად შევიგრძნოთ სიცოცხლის ძალა, ისევ შევავსოთ ეზოები ბავშვების ჟრიამულით, ისევ ბოლომდე მივიყვანოთ შეჩერებული გეგმები, ისევ ვიყოთ ლაღები და ბედნიერები, ისევ გვიხაროდეს ხელის ჩამორთმევა, ისევ დავანახოთ ერთმანეთს კეთილი და გულწრფელი ღიმილი, ისევ ჩავეხუტოთ ერთმანეთს და #ავიცრათერთმანეთისთვის ,

აქვე გენიოსის სიტყვებსაც მოვიშველიებ: „სწავლების კარგად წარმართვაზე დამოკიდებულია არამცთუ სვე-ბედი მარტო მომავლის თაობისა, არამედ - სვე-ბედი თვითონ ქვეყნისა, რადგანაც ქვეყნის მომავალი მომავალი თაობის კუთვნილია და, მაშასადამე, მის ხელთ იქმნება“ /ი.ჭავჭავაძე/ ",- წერს დავით გოგინაშვილი.