რომელ ობიექტებზე მოუწევთ ვაქცინირებულებს "მწვანე პასპორტების" წარდგენა?

საკოორდინაციო საბჭოს შემდეგ გამართულ ბრიფინგზე უწყებათაშორის საკოორდინაციო საბჭოსთან არსებული ოპერაციული შტაბის უფროსმა, გიორგი ღიბრაძემ საზოგადოებას იმ ობიექტების სია გააცნო, სადაც სრულად ვაქცინირებული პირები 1-ელი დეკემბრიდან "მწვანე პასპორტებით" ისარგებლებენ, ესენია:

• რესტორნები, კაფეები, ბარები,  - ღია და დახურული სივრცეები;

• კინოთეატრები, თეატრები, ოპერები, საკონცერტო დარბაზები, გასართობი ცენტრები;

• სამორინეები, სათამაშო ბიზნესთან დაკავშირებული დაწესებულებები;

• სპა ცენტრები, ფიტნეს დარბაზები;

• სასტუმროები;

• სამთო კურორტების საბაგირო გზები.

ამასთანავე, გიორგი ღიბრაძის თქმით, მწვანე სტატუსი ენიჭებათ იმ ადამიანებს, ვინც:

• აცრილია კოვიდსაწინააღმდეგო ვაქცინის 2 დოზით;

• წარადგენს ვალიდურ PCR ან სწრაფ ტესტს;

• გადაიტანა კოვიდინფექცია.

ღიბრაძის თქმით, მწვანე სტატუსი შეუზღუდავი ვადით ენიჭებათ მათ, ვინც კორონავირუსი უკვე გადაიტანა:

"მწვანე სტატუსი ენიჭება ადამიანს, რომელიც არის სრულად ვაქცინირებული, ანუ გაკეთებული აქვს აცრის 2 დოზა, აქვს გადატანილი კოვიდინფექცია. თუმცა ლაბორატორიულად დადასტურებული შემთხვევიდან უნდა იყოს გასული 14 დღე. ამ შემთხვევაში აღარ ვრცელდება პერიოდი, ანუ კოვიდის გადატანის შემდეგ ე.წ ჩამკეტი აღარ არის და მას მწვანე სტატუსი ექნება უკვე მუდმივად. თუ ადამიანს აქვს PCR ტესტი გაკეთებული 72 საათიანი ვალიდურობის, ან თუ გააჩნია 24 საათიანი ვალიდურობის ანტიგენის დამადასტურებელი ტესტი" - განაცხადა გიორგი ღიბრაძემ.