180-მილიონიანი დავა კიევში: ემუქრება თუ არა საფრთხე პატარკაციშვილებისა და საქართველოს წილებს IDS Ukraine-ში?

უკრაინის ხელისუფლება მინერალური წყლების უმსხვილესი მწარმოებელი კომპანიის, IDS Ukraine-ის ნაციონალიზაციასა და მართვის ჩამორთმევას ცდილობს. 180 მილიონ აშშ დოლარად შეფასებული კომპანიის გარშემო მიმდინარე სამართლებრივი დავა უკვე საერთაშორისო მედიის, მათ შორის ბრიტანული The Guardian-ის ყურადღების ცენტრში მოექცა.

დავის მთავარი მიზეზი კომპანიის აქციონერთა სტრუქტურაა. IDS Ukraine-ის 49.99%-ს სანქცირებული რუსი მილიარდერი მიხაილ ფრიდმანი და მისი პარტნიორები („ალფა ჯგუფი“) ფლობენ, 34.83% ბადრი პატარკაციშვილის ოჯახს ეკუთვნის, 7.73% — საქართველოს მთავრობას, ხოლო დარჩენილი ნაწილი სხვა მცირე აქციონერებზე ნაწილდება.

უკრაინის აქტივების მოძიებისა და მართვის სააგენტო (ARMA) აცხადებს, რომ ომის პირობებში კომპანია სტრატეგიულ აქტივს წარმოადგენს და არსებული მენეჯმენტის პირობებში არსებობს ფულის გათეთრებისა და კაპიტალის ქვეყნიდან უკანონოდ გატანის რისკები. მიუხედავად იმისა, რომ ასეთი დანაშაულის ოფიციალური მტკიცებულებები დადგენილი არ არის, ARMA-მ უკვე ჩაატარა კონკურსი დამოუკიდებელი მმართველის შესარჩევად.

პროცესს ამძიმებს ARMA-ზე განხორციელებული კიბერშეტევაც, თუმცა ოფიციალური პირები ადასტურებენ, რომ ამ ინციდენტში პატარკაციშვილების ოჯახი ეჭვმიტანილი არ არის.

პატარკაციშვილების ოჯახი, რომლის ინტერესებსაც ბრიტანეთში მოღვაწე თეატრალური პროდიუსერი ლიანა პატარკაციშვილი და მისი ოჯახის წევრები წარმოადგენენ, აცხადებს, რომ 2022 წლის თებერვლიდან უკრაინის აქტიური მხარდამჭერები არიან.

ოჯახის განცხადებით, არასანქცირებული პარტნიორებისთვის საკუთრების ჩამორთმევა უსამართლოა. თუ უკრაინული სასამართლოები მათ უფლებებს არ დაიცავენ, ისინი დავას საერთაშორისო არბიტრაჟში გააგრძელებენ.

თავის მხრივ, IDS Ukraine-ის წარმომადგენლები კატეგორიულად უარყოფენ ფინანსურ დარღვევებს და აღნიშნავენ, რომ საწარმოს სარაკეტო და დრონებით თავდასხმების დროსაც კი არ შეუწყვეტია უკრაინის მოსახლეობის სასმელი წყლით მომარაგება.

IDS Ukraine იმავე ჰოლდინგის (IDS Borjomi International) ნაწილია, რომელშიც ქართული „ბორჯომი“ შედის. 2022 წელს სანქციების გვერდის ავლითა და ქარხნების გაჩერების თავიდან აცილების მიზნით, 2022 წლის ივნისში IDS Borjomi International-ში - შესაბამისად, ჯგუფში შემავალ კომპანიებშიც - საქართველოს მთავრობას 7.73%-იანი წილი უსასყიდლოდ გადაეცა, რამაც რუსულ მხარეს საკონტროლო პაკეტი დააკარგვინა. ჯერჯერობით უცნობია, რა ბედი ეწევა საქართველოს სახელმწიფოს კუთვნილ წილს IDS Ukraine-ის შესაძლო სრული ნაციონალიზაციის შემთხვევაში. ოფიციალური თბილისის მხრიდან კიევში მიმდინარე პროცესებზე კომენტარი ჯერ არ გაკეთებულა