სომხეთში თხევადი გაზის ფასი 40%-ით მას შემდეგ გაიზარდა, რაც საქართველომ რუსეთიდან გაზის ტრანზიტი დაბლოკა

სომხეთში თხევადი გაზის (LPG) ფასი 40%-ით გაიზარდა. როგორც oc-media წერს ამის მიზეზი გახდა ის, რომ საქართველომ რუსეთიდან გაზის ტრანზიტი დაბლოკა.  გამოცემის ინფორმაციით, ორშაბათის მონაცემებით, თხევადი გაზით დატვირთული დაახლოებით 500 სომხური სატვირთო მანქანა რვა-ცხრა დღის განმავლობაში იყო ჩარჩენილი საქართველოს საზღვარზე, თითოეულში დაახლოებით 22 ტონა საწვავით.  იმპორტიორების თქმით, მათ არ იციან, რა იწვევს პრობლემას. როგორც ისინი აცხადებენ ადრე არასდროს შეხვედრიათ ასეთი სირთულეები, გარდა ამინდისა ან სხვა „ობიექტური“ ფაქტორებისა.  OC MEDIA წერს, რომ ვრცელდება კადრები, სადაც ჩანს, როგორ ასხურებენ მძღოლები წყალს გაზის ცისტერნებს, რათა მაღალი ტემპერატურის პირობებში გააგრილონ, რადგან ტემპერატურამ შეიძლება გაჟონვა ან აფეთქება გამოიწვიოს.  როგორც oc-media წერს საქართველოს მიერ სომხეთის გაზმომარაგების შეფერხებას წინ უძღოდა ის, რომ საქართველომ სომხური ბრენდის გადამზიდ სატვირთო მანქანებს რუსეთში მისი საზღვრების გავლით გადაკვეთა აუკრძალა.  როგორც სომხური მედია წერს, სომხეთიდან რუსეთში ზემო ლარსის საკონტროლო-გამშვები პუნქტის გავლით ალკოჰოლური სასმელების ექსპორტი მნიშვნელოვნად შეფერხდა მას შემდეგ, რაც ლაბორატორიული შემოწმების საბაბით, რამდენიმე ათეული სატვირთო საზღვარზე შეაჩერეს. სომეხი ექსპორტიორების განცხადებით კი შემოწმების დაგვიანების გამო მათ ფინანსური ზარალი განიცადეს. ალკოჰოლური სასმელების სომეხმა მწარმოებლებმა მიმართეს სახელმწიფო და საერთაშორისო სტრუქტურებს, რათა სასწრაფოდ შეეფასებინათ სომხური საქონლის ტრანზიტთან დაკავშირებული დაძაბული სიტუაცია საქართველოს საბაჟო ტერიტორიაზე. წერილის ავტორები ადრესატებისგან მოთხოვდნენ მოეწოდებინათ საქართველოს მთავრობისთვის, შეწყვიტა არასანქცირებული ბლოკადა და გააუქმებინა შეზღუდვები, რომლებიც ხელს უშლიდა საქონლის ტრანზიტულ გადაადგილებას საქართველოს ტერიტორიაზე.  სომხური მედიის ინფორმაციით, კონიაკის ექსპორტთან დაკავშირებული პრობლემა ივნისის დასაწყისში მას შემდეგ მოგვარდა, რაც საქართველოში სომხეთის პრემიერ-მინისტრის დავალებით დელეგაცია ჩამოვიდა და ქართულ მხარესთან შეხვედრა გამართა.