თბილისში „რიყის დოქების“ დემონტაჟის გადაწყვეტილება მიიღეს

თბილისის არქიტექტურის სამსახურის ვებგვერდზე გამოქვეყნებული ინფორმაციით, მიღებულია გადაწყვეტილება რიყის პარკში მდებარე 14 591 კვადრატულ მეტრზე განთავსებული ე.წ. „რიყის დოქების“ დემონტაჟის თაობაზე. ობიექტი ამჟამად შპს „რიყე დომ“-ის საკუთრებაშია.

იტალიელი არქიტექტორის, მასიმილიანო ფუქსასის მიერ დაპროექტებული მუსიკალური ცენტრისა და საგამოფენო დარბაზის მშენებლობა 2011 წელს დაიწყო და მასზე დაახლოებით 75 მილიონი ლარი დაიხარჯა. თუმცა, ხელისუფლების ცვლილების შემდეგ პროექტი შეჩერდა და წლების განმავლობაში დაკონსერვებული იყო. არაერთი ჩაშლილი აუქციონის შემდეგ, 2022 წელს ობიექტი ბიზნესმენმა დავით ხიდაშელმა 10 მილიონ ლარად შეიძინა, თუმცა მას საინვესტიციო ვალდებულებები არ შეუსრულებია, ტერიტორია კი მიტოვებული რჩებოდა, სადაც 2025 წლის იანვარში უბედურ შემთხვევას 16 წლის მოზარდი ემსხვერპლა.

3-წლიანი საინვესტიციო ვადის ამოწურვის წინ ხიდაშელმა ობიექტი გაყიდა. ახალი მფლობელი კომპანია „რიყე დომ“-ი გახდა, ხოლო 2025 წლის მაისში საქართველოს მთავრობის განკარგულებით საპრივატიზაციო პირობები შეიცვალა — ნებადართული გახდა არსებული ნაგებობის დემონტაჟი და ტერიტორიაზე სასტუმროს მოწყობა, რისთვისაც ადგილზე მინიმუმ 44 მილიონი ლარის ინვესტიცია უნდა განხორციელდეს.

2025 წლის ივნისიდან „რიყე დომ“-ის მესაკუთრე კომპანია „მაქრო ფროფერთია“, რომელიც "მაქრო ჰოლდინგის" ერთ-ერთი კომპანიის "მაქრო ქონსთრაქშენის" საკუთრებაშია. ჯგუფის მფლობელია თურქი ბიზნესმენი ემინ უჩარი. გარიგებამდე, "რიყე დომის" მფლობელი იყო კომპანია ნ.გ.ბ, რომლის 100%-იანი წილიც ბიზნესმენ თორნიკე კოპალიანს ეკუთვნოდა. თავის მხრივ, მაქრო ჯგუფი საქართველოში უძრავი ქონების ერთ-ერთი უმსხვილესი კომპანიაა, რომელიც მოიცავს როგორც მაღალი კლასის სასტუმროს - Swissotel Tbilisi-ს, ასევე პროექტ მაქრო სითის და სამშენებლო კომპანია მაქრო ქონსთრაქშენს.ახალ კერძო ინვესტორს თბილისის არქიტექტურის სამსახურისთვის შენობის დემონტაჟის შემდეგ განსავითარებელი სასტუმროს პროექტი ჯერჯერობით არ წარუდგენია, შესაბამისად, უცნობია მისი სართულიანობა და ბრენდი, რომლის სახელითაც ოპერირებას დაიწყებს.