დეკემბრის თვის მნიშვნელოვანი თარიღები, რა დროსაც ასტროლოგები გვირჩევენ, განსაკუთრებული ყურადღება გამოვიჩინოთ

დეკემბერი შესაძლოა რადიკალური გადაწყვეტილებების პერიოდი აღმოჩნდეს. საქმე ისაა, რომ დეკემბრის თვეში პლანეტა პლუტონი თხის რქისა და მერწყულის ნიშნებს შორის იქნება. ასტროლოგების თქმით, ეს პოზიცია, შესაძლოა, ბევრი ჩვენგანისთვის გრანდიოზული ცვლილებების ეტაპის დასაწყისი იყოს.

თვის 20 რიცხვამდე ალბათ, ბევრი ჩვენგანი ემოციურ არასტაბილურობას, მომატებულ შფოთვას, იმპულსური გადაწყვეტილებების მიღებისაკენ სწრაფვას, კომუნიკაციის გართულებასა და უძილობას განიცდის. თუმცა, ასტროლოგების თქმით, ეს საუკეთესო პერიოდია, რომ საკუთარი გრძნობები და ემოციები გამოხატოთ, საყვარელ ადამიანებს სიყვარულში გამოუტყდეთ, მიიღოთ მათგანაც სითბო და სასიამოვნო განწყობით დაიმუხტოთ. 

დეკემბრის თვის პირველივე დღეს მერკური თხის რქის ნიშანში შედის. ასტროლოგების თქმით, ეს საუკეთესო პერიოდია ყველა იმ ადამიანისათვის, რომლებსაც თვითგანვითარება სურს. აზროვნება და გონება გაცილებით სხარტია და ყველა გაფანტული იდეა თავის ადგილზე ბრუნდება. საბოლოოდ განსაზღვრავთ, რაზე უნდა კონცენტრირდეთ და რა მიმართულებით გსურთ განვითარება. ამიტომ, ახალი ცოდნის მისაღებად, მასტერკლასებსა და ტრენინგებზე დასასწრებად, სამსახურში თქვენი შესაძლებლობებისა და უნარების სრულად გამოსავლენად შესანიშნავი დროა.

13 დეკემბერს ახალი მთვარეა. ასევე, ამავე რიცხვში პლანეტა მერკური რეტროგრადულ მოძრაობას იწყებს. ასტროლოგები გირჩევენ, რომ 12, 13 და 14 დეკემბერს მნიშვნელოვანი არაფერი დაგეგმოთ, რადგანაც ეს ერთ-ერთი ყველაზე ემოციური პერიოდი იქნება, რა დროსაც შესაძლოა, ემოციების გაკონტროლება გაგიჭირდეთ და მიიღოთ ისეთი გადაწყვეტილებები, რომელთა შედეგსაც შემდეგ ინანებთ. ასევე, ასტროლოგების თქმით, ამ დღეებში იმატებს გზებზე შეფერხებების, ავარიების რისკები, ამიტომაც მოგვიწოდებენ, ამ მიმართულებითაც ყურადღებით ვიყოთ.

ამავე პერიოდში, ჯობს კარგად დააკვირდეთ თითოეულ ინფორმაციას. შესაძლოა, მანიპულაციების, ჭორისა და გადაუმოწმებელი ამბების მსხვერპლნი გახდეთ.

ნუ გადაწყვეტთ მასშტაბური პროექტების დაგეგმვასა და განხორციელებას და თუ შესაძლებელია, შემდეგი დღეებისთვის გადადეთ. როგორც წესი, ამ პერიოდში ადამიანებს რაციონალური გადაწყვეტილებების მიღება უჭირთ და სწორად ვერ განსაზღვრავენ, რა სჭირდებათ რეალურად.

ასევე, ასტროლოგები გირჩევენ, აღნიშნულ დღეებში ძვირად ღირებული შესყიდვებისაგან თავი შეიკავოთ. თუკი რაიმეს შეძენას გადაწყვეტთ, ჩეკი, ნივთის მდგომარეობა კარგად შეამოწმეთ. ეს განსაკუთრებით ტექნიკას ეხება.

შეეცადეთ, დრო მშვიდად გაატაროთ, არ ჩაერთოთ კონფლიქტურ სიტუაციაში და გამოიჩინოთ სიფრთხილე.