დიზაინერმა შექმნა მაისური, რომელიც ხელოვნური ინტელექტის მეთვალყურეობის სისტემებს ატყუებს

გერმანელმა დიზაინერმა სიმონ ვეკერტმა შექმნა ჭრელი, ფერადი მაისური სახელწოდებით „Digital Camouflage“, რომლის მიზანიც ხელოვნური ინტელექტის (AI) ვიდეომეთვალყურეობის სისტემების მიერ ადამიანის ამოცნობის ბლოკირებაა.

დიზაინერმა ეს სამოსი ბერლინში დაგეგმილი სიახლის საპასუხოდ შექმნა, სადაც კოტბუსერ ტორის მოედანზე ვიდეოკამერებში ხელოვნური ინტელექტის ინტეგრირებას იწყებენ.

სპეციალური ფერებისა და ორნამენტების კომბინაციით შექმნილი სამოსი ობიექტების ამოცნობის ალგორითმს აბნევს, რის გამოც სისტემა მოძრავ ადამიანს ობიექტად ვეღარ აღიქვამს.

"AI სისტემები მრავალშრიანია და მათ წარმოდგენა არ აქვთ, სინამდვილეში რა არის ადამიანი. მათ მხოლოდ ის იციან, თუ როგორ გამოიყურება იგი მილიონობით ფოტოს სტატისტიკური ანალიზით. საწყის შრეებზე ალგორითმი მხოლოდ ხაზებს, კონტრასტებსა და ტექსტურას ხედავს, ხოლო სიღრმეში - კონკრეტულ დეტალებს: თავ-მხრების სილუეტს, სხეულის პროპორციებსა და კონტურებს. ტექნოლოგიისთვის "ადამიანი" მხოლოდ ვიზუალური მონაცემების ერთობლიობაა, რაც მისი მთავარი სუსტი მხარეა." - აცხადებს დიზაინერი.

ვეკერტის განმარტებით, სამოსზე არსებული მკვეთრი ფერები და ფორმები არღვევს სხეულის კონტურებს, რის გამოც დეტექტორი ვერ ახერხებს ვიზუალური ნაწილების ერთ სხეულად აწყობას. შედეგად, ადამიანის თვალისთვის ეს უბრალოდ ჰიპნოტიკური პრინტია, ხოლო ხელოვნური ინტელექტისთვის - არაფერი.

დიზაინერმა მაისურის პრინტი თავად ხელოვნური ინტელექტის დახმარებით, სპეციალური ციკლური ტესტირების (Adversarial Loop) მეთოდით შექმნა. გამოსახულება მანამდე კორექტირდებოდა, სანამ AI სისტემამ ადამიანის ამოცნობა სრულად არ შეწყვიტა.

პროდუქტის ტესტირება რეალური დროის ობიექტების ამოცნობის პოპულარულ ღია სისტემა YOLO-ზე განხორციელდა.