იაპონია ხანდაზმულთა რაოდენობით რეკორდსმენია - რა არის მათი დღეგრეძელობის საიდუმლო

ჯანდაცვის მსოფლიო ორგანიზაციის მონაცემებით, იაპონიის მოქალაქეები ყველაზე მაღალი სიცოცხლის ხანგრძლივობით გამოირჩევიან. იაპონიის ჯანდაცვის სამინისტროს ინფორმაციით, ამჟამად ქვეყანაში 100 წელს გადაცილებული 95 119 ადამიანია (მათ შორის, 83 ათასი ქალია) - ეს 2980-ით მეტია, ვიდრე ერთი წლის წინ იყო.

100 წელს გადაცილებულების გარდა, ქვეყანაში 65 წელს გადაცილებული ადამიანების რაოდენობაც რეკორდულია და 36,25 მილიონს შეადგენს, რაც მთლიანი მოსახლეობის 29,3%-ია. ამ მაჩვენებლის მიხედვით, იაპონია 200 ქვეყნისა და რეგიონის სიის სათავეშია, სადაც 100 ათასზე მეტი ადამიანი ცხოვრობს.

***

იაპონიის ჯანდაცვის სამინისტრომ აღნიშნა, რომ ხანდაზმულთა დიდი რაოდენობა ჯანდაცვისა და სოციალური მომსახურების ხარჯებს ზრდის და ამცირებს მომუშავე მოსახლეობის რაოდენობას. ამ პრობლემის გადასაჭრელად ხელისუფლებამ საპენსიო ასაკის გაზრდა გადაწყვიტა.

***

მეცნიერებს მიაჩნიათ, რომ იაპონელების დღეგრძელობის საიდუმლო დიეტასა და სასმლის მიღების განსაკუთრებულ ჩვევებში იმალება.

კერძოდ, იაპონელების ყველაზე საყვარელი სასმელი არის იაპონური ტრადიციული ჩაი. ის ჩვეულებრივი ჩაისგან განსხვავებულია და მკვეთრი მწვანე ფერის ფხვნილს წარმოადგენს.

სასმელი შეიცავს A, B, C, E ვიტამინებს, ასევე საკვებ ბოჭკოებს, თუთიას, კალიუმს, კალციუმს, ნატრიუმს და რკინას, რაც ხელს უწყობს დღეგრძელობას.

ამას გარდა, მეცნიერებმა გამოარკვიეს, რომ ეს ტრადიციული სასმელი აქვეითებს სისხლში ქოლესტერინისა და შაქრის დონეს, აძლიერებს იმუნურ სისტემას, ამცირებს ონკოლოგიური დაავადებების, დიაბეტისა და სიმსუქნის განვითარების რისკს.