8 და 11 წლის მოზარდებს სექსუალური შინაარსის ფოტო-ვიდეოს გადაღებას აიძულებდა და თავადაც უგზავნიდა - ბრალდებულზე ძებნაა გამოცხადებული

საქართველოს პროკურატურამ 14 წლის ასაკს მიუღწეველი ორი არასრულწლოვნის მიმართ ჩადენილი გარყვნილი ქმედების, სექსუალური ხასიათის ქმედების იძულებისა და პირადი ცხოვრების საიდუმლოს ხელყოფის ფაქტებზე ერთ პირს ბრალდება დაუსწრებლად წარუდგინა.

თბილისის პროკურატურის პირადი ცხოვრების ხელყოფის წინააღმდეგ ბრძოლის სამმართველოს მიერ ჩატარებული გამოძიებით დადგინდა, რომ ბრალდებული სოციალურ ქსელ TikTok-ის ყალბი ანგარიშებისა და WhatsApp-ის მეშვეობით 8 და 11 წლის მოზარდებს დაუკავშირდა.

ნდობის მოპოვების შემდეგ, იგი ბავშვებთან სექსუალური შინაარსის კომუნიკაციას დამყარებას ცდილობდა:

დაზარალებულების ასაკის გამოყენებითა და სახელის გამტეხი ინფორმაციის გავრცელების მუქარით, იგი აიძულებდა მოზარდებს, ინტიმური შინაარსის (მათ შორის სექსუალური ხასიათის ქმედებების ამსახველი) ფოტო-ვიდეო მასალა გადაეღოთ და მისთვის გაეგზავნათ;

ერთ-ერთ დაზარალებულს ბრალდებული თავადაც უგზავნიდა სექსუალური შინაარსის ვიდეოებს;

გარდა ამისა, მან არასრულწლოვნისგან უკანონოდ მოპოვებული ინტიმური ფოტოები მოზარდის დედას გადაუგზავნა.

ბრალდებულს ბრალი დაუსწრებლად წარედგინა საქართველოს სისხლის სამართლის კოდექსის შემდეგი მუხლებით:

157-ე პრიმა მუხლის 1-ლი ნაწილი — პირადი ცხოვრების საიდუმლოს უკანონოდ მოპოვება, გამოყენება და გავრცელება;  141-ე მუხლის მე-2 ნაწილის „ვ“ ქვეპუნქტი — წინასწარი შეცნობით 14 წლის ასაკს მიუღწეველი პირის მიმართ გარყვნილი ქმედება; 139-ე მუხლის მე-4 ნაწილის „ბ“ ქვეპუნქტი — არასრულწლოვნის მიმართ სექსუალური ხასიათის ქმედების იძულება.

აღნიშნული მუხლები სასჯელის სახედ 15 წლამდე ვადით თავისუფლების აღკვეთას ითვალისწინებს.

ბრალდებულს, სხვა სისხლის სამართლის საქმეზე, აღკვეთის ღონისძიების სახით პატიმრობა უკვე დაუსწრებლად აქვს შეფარდებული და მის მიმართ გამოცხადებულია ძებნა. პროკურატურამ წინასასამართლო სხდომის თარიღის ჩანიშვნის შუამდგომლობით სასამართლოს უკვე მიმართა.

უწყების განცხადებით, პროკურატურა აღნიშნული კატეგორიის საქმეებზე მკაცრ სისხლის სამართლის პოლიტიკას ატარებს და ბრალდებულის მიმართ შესაბამის სამართლებრივ ღონისძიებებს გაატარებს.