ახალი დეტალები სოფელ კაბალიდან გატაცებულ 23 წლის გოგოზე

გატაცება სოფელ კაბალიდან – თელავის პოლიციის თანამშრომლები 23 წლის გუნელ გასანოვას მთელი კახეთის მასშტაბით ეძებენ. “პირველების” ინფორმაციით, ახალგაზრდა 28 ივლისს, საღამოს 7 საათზე იმ დროს გაიტაცეს, როდესაც ახალგაზრდა გოგო ბებიასთან ერთად საკუთარი საცხოვრებელი სახლის მიმდებარე ტერიტორიაზე გადაადგილდებოდა.

როგორც მეზობლები “პირველების” კორესპონდენტს უყვებიან, სწორედ ქუჩაში სეირნობის დროს გოგოს ახლობლად “მერსედესის” მარკის ვერცხლისფერი ავტომობილი გაჩერდა, საიდანაც სამი პირი გადმოვიდა.

ირკვევა, რომ თავდაპირველად, სავარაუდო დამნაშავეები ბებიას ფიზიკურად გაუსწორდნენ და მას შემდეგ, რაც ხანშიშესული ქალი ცემის შედეგად მიწაზე დაეცა, ახალგაზრდა კაცმა გუნელ გასანოვა ავტომობილში ძალის გამოყენებით ჩასვა და გაიტაცა. 

ადგილობრივების ინფორმაციით, 23 წლის ახალგაზრდა ქორწინების მოტივით გაიტაცეს. როგორც მეზობლები “პირველებთან” ამბობენ, გატაცებული გოგო და გამტაცებლები თანასოფლელები არიან, თუმცა მათ ერთმანეთთან არანაირი სახის კავშირი არ ჰქონიათ.

სოფლელია ვინც მოიტაცა. ბებია სახლში იყო. სამნი იყვნენ. ერთი მძღოლი იყო. ერთმანეთს არ იცნობდნენ, თანასოფლელები იყვნენ. გავიგეთ, რომ ავტომობილი თელავის სოფელ ყარაჯალაშია შესული. ავტომობილი იპოვეს და წაიყვანეს. მეზობლებს აქვთ კამერა, მაგრამ არ გვაჩვენეს”, – ამბობს მეზობელი.
საქმეში გუნელ გასანოვას ოჯახის ადვოკატიც ჩაერთო, რომელიც გატაცებული გოგონას ადგილსამყოფლის დადგენას და ახალგაზრდის სახლში დროულად დაბრუნებას ითხოვს.

მტკიცებულებებიც არ მინახია, არ გავრკვეულვარ. არ შევხვედრილვარ გამომძიებელს. მიუხედავად იმისა, რომ ჯერჯერობით მოტაცებული გოგოს ძებნა მიმდინარეობს, ამაზე კომპეტენტური მხარე არის პოლიცია, რომელმაც მაქსიმალურად ყველაფერი უნდა გააკეთოს, უსწრაფეს და უმოკლეს დროში უნდა დაადგინოს გოგოს ადგილსამყოფელი, უნდა შეეცადოს, რომ უვნებელი დაუბრუნოს ოჯახს და მერე მიიღოს ზომები, როგორც დაკავების, ასევე პროცესის სამართლებრივი განვითარების”, – ამბობს ადვოკატი.მომხდარზე გამოძიება საქართველოს სისხლის სამართლის კოდექსის 143-ე მუხლით დაიწყო, თუმცა შინაგან საქმეთა სამინისტროს ამ დრომდე არ მოუხდენია არც ერთი პირის იდენტიფიცირება, რომელმაც 23 წლის გუნელ გასანოვა გაიტაცა.