აშშ-ში საქართველოს მოქალაქეს ჯანდაცვის სისტემაში თაღლითური სქემით $1.3 მილიარდის გათეთრების საქმეზე ბრალი წაუყენეს

ბოსტონის ფედერალურმა ნაფიც მსაჯულთა სასამართლომ საქართველოს 33 წლის მოქალაქეს, ერეკლე გუგავას, ბრალი წაუყენა ფულის გათეთრების შეთქმულებაში, რომელიც აშშ-ის ჯანდაცვის სისტემაში განხორციელებულ 1.3 მილიარდი დოლარის ოდენობის თაღლითურ სქემას უკავშირდება. ინფორმაციას ამის შესახებ მასაჩუსეტსის შტატის აშშ-ის ოლქის პროკურატურა ავრცელებს.

სასამართლო დოკუმენტების თანახმად, გუგავა აშშ-ში არალეგალურად იმყოფებოდა და დანაშაულებრივი ქმედებების განხორციელების შემდეგ, 2025 წლის ივლისში, ქვეყნიდან გაიქცა.

საგამოძიებო უწყებების ინფორმაციით, გუგავა ფულის გამთეთრებლად მუშაობდა უცხოეთში (მათ შორის რუსეთში) ბაზირებული დანაშაულებრივი ორგანიზაციისთვის. აღნიშნულმა ჯგუფმა დაგეგმა და განახორციელა აშშ-ის იუსტიციის დეპარტამენტის ისტორიაში ჯანდაცვის სფეროში ყველაზე მასშტაბური თაღლითური სქემა, რომელსაც სამართალდამცავებმა „Operation Gold Rush“ უწოდეს.

საქმის მასალების მიხედვით: 2025 წლის თებერვლიდან ივლისამდე გუგავა ფიქტიურად ფლობდა პენსილვანიაში დარეგისტრირებულ სამედიცინო აპარატურისა და აღჭურვილობის კომპანიას — ND Medical Solutions, LLC (ND Medical). ამ 5 თვის განმავლობაში, ND Medical-მა წარადგინა სულ მცირე 1.3 მილიარდი დოლარის ყალბი მოთხოვნა სახელმწიფო პროგრამა Medicare-ში, კერძო სადაზღვევო კომპანიებსა და პროფკავშირულ ჯანდაცვის ფონდებში. სადაზღვევო კომპანიებმა კომპანიის ანგარიშებზე რეალურად გადარიცხეს დაახლოებით 6.5 მილიონი დოლარი. გუგავამ ND Medical-ის სახელზე გახსნა რამდენიმე საბანკო ანგარიში, სადაც ერთპიროვნული ხელომწერის უფლებით სარგებლობდა. მასზე ირიცხებოდა სადაზღვევო ჩეკები, რის შემდეგაც თანხები უცხოურ საბანკო ანგარიშებზე გადარიცხვით თეთრდებოდა და დანაშაულებრივ ორგანიზაციას გადაეცემოდა.

ყალბი ანგარიშ-ფაქტურების მისათვისებლად, დანაშაულებრივი ჯგუფი მასაჩუსეტსისა და აშშ-ის სხვა შტატების მცხოვრებთა (მათ შორის ხანდაზმულთა და შეზღუდული შესაძლებლობის მქონე პირთა) მოპარულ პერსონალურ მონაცემებს იყენებდა.

მოქალაქეებმა Medicare-ისგან მიიღეს ცნობები ისეთი სამედიცინო აღჭურვილობის მიწოდების შესახებ ND Medical-ისგან, რაც მათ რეალურად არასდროს შეუკვეთავთ და ისეთი ექიმებისგან, რომლებთანაც ვიზიტზე არასდროს ყოფილან.

გამოძიების განმარტებით, ჯანდაცვის სფეროდან მოპოვებული უკანონო შემოსავლები განსაკუთრებით ადვილი გასათეთრებელი იყო, ვინაიდან თანხები ოფიციალური სახელმწიფო და კერძო სადაზღვევო წყაროებიდან ირიცხებოდა, რაც მათ თავიდანვე ლეგალურ იერსახეს აძლევდა.

ფულის გათეთრების შეთქმულების ბრალდება ითვალისწინებს: 20 წლამდე თავისუფლების აღკვეთას; 3 წლით ზედამხედველობის ქვეშ ყოფნას; ჯარიმას 500,000 დოლარამდე, ან გათეთრებული თანხის ორმაგი ოდენობით.

საბოლოო სასჯელს აშშ-ის ფედერალური საოლქო სასამართლოს მოსამართლე კანონმდებლობისა და სასჯელის დანიშვნის სახელმძღვანელო პრინციპების შესაბამისად დაადგენს.

მასაჩუსეტსის შტატის აშშ-ის ოლქის პროკურატურა გავრცელებულ ცნობაში აზუსტებს, რომ საბრალდებო დასკვნაში მოყვანილი დეტალები წარმოადგენს ბრალდებებს. ბრალდებული უდანაშაულოდ ითვლება, ვიდრე მისი ბრალეულობა კანონით დადგენილი წესით სასამართლოში არ დამტკიცდება.