ლაზერის პროცედურისას ქალებს სავარაუდოდ ფოტოებს ფარულად უღებდნენ - სკანდალური დეტალები ყოფილი პოლიციელის საქმეში

სკანდალი ესთეტიკური მედიცინის ცენტრისა და ყოფილი პოლიციელის, დავით ჭითანავას ირგვლივ — საქმის მასალების მიხედვით, არ არის გამორიცხული, რომ ესთეტიკის ცენტრიდან პირადი ცხოვრების ამსახველი ფოტოები გავრცელდა.

ბრალდებულ პოლიციელს პროკურატურა პირადი ცხოვრების საიდუმლოს უკანონოდ მოპოვება-შენახვა-გავრცელებასა და სისტემატურ ადევნებაში ედავება. სასამართლომ მას აღკვეთის ღონისძიების სახით 60 000-ლარიანი საპატიმრო გირაო შეუფარდა.

საქმის ერთ-ერთი მთავარი დეტალი სწორედ ესთეტიკის ცენტრის შესაძლო კავშირს ეხება. დაკავებულის ადვოკატი, სოსო ჯანაშია ტელეკომპანია „ფორმულასთან“ საუბრისას ადასტურებს, რომ გამოძიების ვერსია სწორედ სალონის სპეციალისტის მიერ ფოტოების გაგზავნას უკავშირდება, თუმცა ბრალდებას „სისულელეს“ უწოდებს და აცხადებს, რომ საქმეში მხოლოდ ოპერატიული ცნობებია და რეალური მტკიცებულებები არ არსებობს.

„ოპერატიული ინფორმაციაა მხოლოდ, დანარჩენი არაფერი მტკიცებულება ბრალდების მხარეს არ წარმოუდგენია. დაახლოებით ასეთი თემაა, რომ ოპერატიული ინფორმაციით, შესაძლოა, ესთეტიკური ცენტრის რომელიღაც სპეციალისტის მიერ გაგზავნილი ყოფილიყო დავით ჭითანავას ტელეფონზე რაღაც პირადი ცხოვრების ამსახველი კადრები, რაც სრული სისულელეა. ესენი ვარაუდობენ, რომ სექსუალური ხასიათის სურათები შეიძლება იყოსო და ესთეტიკის ცენტრში რა სექსუალური ხასიათის სურათები უნდა იყოს. ჩვეულებრივად, ეპილაციაზე მისული ქალბატონების სურათებს გულისხმობენ ალბათ, თუმცა მსგავსი არაფერი არ ყოფილა“, — აცხადებს ადვოკატი სოსო ჯანაშია.

თავად ესთეტიკის ცენტრი გავრცელებულ ინფორმაციას არ ადასტურებს და პაციენტების ფოტოების გაჟონვას უარყოფს.

პროკურატურის ცნობით, ბრალდებულმა WhatsApp-ის მეშვეობით უკანონოდ მოიპოვა და შეინახა სამი დაზარალებულის პირადი ცხოვრების საიდუმლოს ამსახველი ფოტოები, ხოლო ერთ-ერთი მათგანის ფოტომასალა Messenger-ით სხვა პირს გადაუგზავნა.

„ასევე, ბრალდებული სისტემატურად უკანონოდ უთვალთვალებდა დაზარალებულს, გადაადგილდებოდა მის საცხოვრებელ სახლთან და მასთან არასასურველ კომუნიკაციას ამყარებდა, რის შედეგადაც დაზარალებულმა ფსიქიკური ტანჯვა განიცადა და იძულებული გახდა მნიშვნელოვნად შეეცვალა ცხოვრების წესი“, — აღნიშნულია პროკურატურის განცხადებაში.

საქმეზე გამოძიება და საპროცესო მოქმედებები გრძელდება.