მკვლელობა ახალი წლის ღამეს ვაკეში

მკვლელობა ვაკის კორტებთან ახალი წლის ღამეს - "პირველებისთვის" ცნობილი ხდება, რომ ბიზნესმენის განზრახ მკვლელობის ბრალდებით დაკავებული მალხაზ ბაგათელიაა. როგორც მისი ადვოკატი "ტვ პირველთან" ამბობს, ბაგათელია დანაშაულს არ აღიარებს, დუმილის უფლებას იყენებს და არც გამოძიებისთვის მიუცია ჩვენება.

მალხაზ ბაგათელია სამართალდამცველებმა დანაშაულის ჩადენიდან რამდენიმე საათში, აბაშაში დააკავეს - ადვოკატი ირწმუნება, რომ დაკავებულს მიმალვა არ უცდია.

"პირველების" ინფორმაციით, მოკლულიც და მკვლელობაში ბრალდებულიც ბიზნესპარტნიორები იყვნენ, რომელთაც კონფლიქტი ფულის გამო მოუვიდათ. საქმის გარჩევა ჯერ თბილისის ზღვაზე დაიწყო, მეორე, საბედისწერო დღეს კი ბაგათელიამ მოკლული ვაკეში დაიბარა, სადაც რამდენიმე გასროლით დაცხრილა.

ვუსამძიმრებ გარდაცვლილის ოჯახს, რაც შეეხება ჩემი დაცვის ქვეშ მყოფს ის იყენებს დუმილის უფლებას. მას ჯერ ბრალი არ აქვს წარდგენილი, ამიტომ საქმის მასალები არ გვაქვს გადმოცემული. დეტალებზე ვერ ვისაუბრებ. გარდაცვლილი პირის იდენტიფიცირებაზე ამ ეტაპზე თავს შევიკავებ. კავშირებზე ვერაფერს ვიტყვი. მეც მხოლოდ გავრცელებული ინფორმაციით ვიცი. თვითონ ჩემი დაცვსი ქვეშ მყოფი იყენებს დუმილის უფლებას და საერთოდ არ სურს ამაზე საუბარი. ამბობს, რომ მიმალვას არ ცდილობდა. მას აქვს დასავლეთ საქართველოში სახლი და მიდიოდა სახლში. რითი დატოვა თბილსიის არ ვიცი, რადგან დეტალებზე არ საუბრობს", - აცხადებს ადვოკატი. 
"პირველების" ინფორმაციით, გამოძიებას ამოღებული აქვს სატელეფონო კომუნიკაცია, რომელიც მოკლულსა და მკვლელობის ბრალდებით დაკავებულს შორის იყო. ბაგათელიას ბრალს ოფიციალურად ხვალ წარუდგენენ.

შეგახსენებთ, რომ მკვლვლობა ვაკის კორტებთან გუშინ მოხდა. შსს-ს ცნობით, გამოძიება სისხლის სამართლის კოდექსის ორი მუხლით დაიწყო. 236-ე მუხლით, რაც ცეცხლსასროლი იარაღის მართლსაწინააღმდეგო შეძენა, შენახვა, ტარება და 108-ე მუხლით, რაც განზრახ მკვლელობას გულისხმობს.