ვიდეო - პირველი ინტერვიუ საქართველოს მოქალაქესთან, რომელსაც 67-წლიანი პატიმრობა ელოდება

"ნოდარ მელაძის შაბათის" ექსკლუზივი -  პირველი ინტერვიუ  36 წლის ქართველ პატიმართან,  რომელიც ევროპის ჩემპიონატზე საქართველოს ნაკრების საგულშემატკივროდ წავიდა და სტადიონის ნაცვლად გერმანიის ციხეში აღმოჩნდა.

არტურ ბულედიანს  67 წლით პატიმრობა ემუქრება. საქართველოში ცნობილი იუტუბერი „შაბათის ეთერს" გერმანიის  რატინგენის საპატიმროდან დაუკავშირდა, სადაც სამ თვეზე მეტია, ყველაზე საშიში პატიმრების სიაშია და სრულ იზოლაციაში იმყოფება.

ინტერნეტ სივრცეში კი „ნეტენდერულის“ სახელით ცნობილი "იუტუბერი" გერმანიის  ციხეში ამერიკის გამოძიების ფედერალური ბიუროს მოთხოვნით აღმოჩნდა - ედავებიან 7 მილიონი დოლარის  მითვისებას და მსოფლიოში ყველაზე დიდი რუსი ჰაკერების დაჯგუფების „ვერი ფაილდის" ლიდერობას.

FBI-ის მტკიცებით, ინტერნეტ კრიმინალების ბანდამ შტატების საბანკო სისტემებში შესაღწევად პროგრამებში შექმნა, ასობით ამერიკელის პირად ანგარიშების მონაცემები უკანონოდ მოიპოვა და შავ ბაზარზე გაყიდა. 
"შაბათის ეთერის" რესპოდენტი ექსკლუზიურ ინტერვიუში ამბობს, რომ საქართველოდან გერმანიაში ჩასულმა აღმოაჩინა, რომ 22 ქვეყანაში ინტერპოლის წითელი ცირკულარით ძებნილი იყო და 67-წლიანი სასჯელი ელოდებოდა.

„შაბათის ეთერთან“ ცნობილი "იუტუბერი" ირწმუნება, რომ დანაშაული რომლის გამოც პრაქტიკულად სიცოცხლის ბოლომდე ციხეში ყოფნა ელოდება, არასდროს ჩაუდენია და მხოლოდ დიუსელდორფის წინასწარი მოთავსების იზოლატორში დოკუმენტების გაცნობის  დროს აღმოაჩინა, რომ მას ამერიკის გამოძიების ფედერალური ბიურო იმ ჰაკერული ქსელის ლიდერობას ედავება, რომლის შესახებ არასდროს არაფერი სმენია.

გერმანიის ციხის ქართველი პატიმარი რომლის ექსტრადირებასაც ახლა ამერიკის შეერთებული შტატები ითხოვს, ამტკიცებს, რომ გაუგებრობის მსხვერპლია, რადგან „FBI -ის ფაილებში მითითებულ წლებში,  როდესაც ის თითქოს დანაშაულს ჩადიოდა, საქართველოში  სასჯელს იხდიდა, საუბარია 2014 წლიდან 2016 წლამდე როდესაც ბულედიანი გლდანის ციხეში იმყოფებდა და სადაც - ინტერნეტთან წვდომა ვერ ექნებოდა.

კაცი ამტკიცებს, რომ 2008 წელს  ჰაკერებმა მისი  მეილი გატეხეს სადაც მისი პასპორტის ელექტრონული ასლი ინახებოდა. პატიმარი ვარაუდობს, რომ სწორედ მისი მოპარული პასპორტი გამოიყენეს „ვერდიფაილდის“ წევრებმა მძიმე დანაშაულისთვის.

არტურ ბულედიანის ოჯახი სახელმწიფოსგან დახმარებას ითხოვს - დაკავებულის ოჯახის წევრების მტკიცებით, განსაცდელში მყოფი კაცი საელჩომ არც კი მოინახულა.