გორში Kordz-ის კონცერტი მუქარისა და უსაფრთხოების გარანტიების არარსებობის გამო გაუქმდა

გორში, „კამარა ფესტივალის“ ფარგლებში 26 სექტემბერს დაგეგმილი მუსიკოს ალექსანდრე კორძაიას (Kordz-ი) კონცერტი გაუქმდა. ორგანიზატორებისა და მუსიკოსის განცხადებით, გადაწყვეტილების მიზეზი „ქართული ოცნების“ წარმომადგენლებისა და პროპაგანდისტული მედიის მხრიდან განხორციელებული შეტევა და მუქარაა.

ღონისძიების გადადების შესახებ თავდაპირველად  ორგანიზატორმა, დანიის კულტურის ინსტიტუტმა განაცხადა:

„უსაფრთხოების მიზნებიდან გამომდინარე, „კამარა ფესტივალი“ დაგეგმილი სახით ვერ ჩატარდება და, შესაბამისად, ის გადაიდო“.

კონცერტის გაუქმებას სოციალურ ქსელში გამოეხმაურა თავად ალექსანდრე კორძაიაც:

„მიზეზი მარტივია: ადგილობრივი ხელისუფლების, „ოცნების“ წევრებისა და პროპაგანდისტული მედიების შეტევისა და მუქარის გამო, ადგილზე უსაფრთხოების არანაირი გარანტია არ არსებობს. საწყენია, რომ ამ პოლიტიკური შეტევის გამო, პირველ რიგში, ადგილობრივი ახალგაზრდები ზარალდებიან. ვწუხვარ, რომ ასეთ რეალობაში ვცხოვრობთ. და დიდი მადლობა ყველას გვერდში დგომისთვის“.

ღონისძიების გაუქმებას წინ უძღოდა მმართველი პარტიის კრიტიკა. „ქართული ოცნების“ დეპუტატმა თორნიკე ჭეიშვილმა ფესტივალზე Kordz-ის მონაწილეობა „რადიკალიზმის წახალისებად“ შეაფასა:

„აღნიშნული პირის მხრიდან ადგილი ჰქონდა ფართო საზოგადოებრივი ჯგუფების პირდაპირ მძიმე შეურაცხყოფას და, რა თქმა უნდა, როდესაც ახლა კონკრეტული დიპლომატიური მისიები ახდენენ ერთგვარ წახალისებას ამ ე.წ. მუსიკოსისა, რა თქმა უნდა, ისინი ამით ცდილობენ, როგორც ჩანს, რომ ცეცხლზე ნავთი დაასხან“.

ალექსანდრე კორძაია პროევროპული აქციების აქტიური მხარდამჭერია. მუსიკოსს, რომელიც ანტისამთავრობო პროტესტებთან ასოცირებული სიმღერის („ოლე ოლა“) გამო მმართველი გუნდის სამიზნე არაერთხელ გახდა, 2026 წლის ივლისში თბილისში თავსაც დაესხნენ.