ადამ კადიროვმა კიდევ ერთი ჯილდო მიიღო - ოკუპირებულ აფხაზეთთან "საბრძოლო თანამეგობრობისთვის"

ჩეჩნეთის ლიდერის 18 წლის ვაჟმა, ადამ კადიროვმა, არაღიარებული აფხაზეთის თავდაცვის სამინისტროსგან მედალი „საბრძოლო თანამეგობრობისთვის“ მიიღო. ამის შესახებ რესპუბლიკის ხელმძღვანელმა რამზან კადიროვმა ძალოვან უწყებებს შორის ტაქტიკურ სროლაში ჩემპიონატის გამარჯვებულთა დაჯილდოების ცერემონიის შემდეგ განაცხადა.

მისი თქმით, ჯილდო მას „მაღალი დონის ურთიერთქმედებისა და თანამშრომლობის განმტკიცებისთვის“ გადაეცა.

შეჯიბრება გუდერმესში, ვლადიმერ პუტინის სახელობის ე.წ. „სპეცდანიშნულების რაზმის რუსულ უნივერსიტეტში“ (РУС) გაიმართა, სადაც, როგორც „Кавказ.Реалии“ აღნიშნავს, უკრაინის წინააღმდეგ ომში გასაგზავნად დაქირავებულ მებრძოლებს ამზადებენ. ტურნირში მათ შორის აფხაზეთიდან ჩასული მებრძოლებიც მონაწილეობდნენ.

ადამ კადიროვს რამზან კადიროვის თანაშემწის, რესპუბლიკის ხელმძღვანელის უსაფრთხოების უზრუნველყოფის განყოფილების უფროსისა და ჩეჩნეთის უშიშროების საბჭოს მდივნის თანამდებობები უკავია. იგი ასევე დაინიშნა სპეცდანიშნულების რაზმის რუსული უნივერსიტეტის, ჩეჩნეთის შსს-ს, უკრაინის წინააღმდეგ მებრძოლი ორი ბატალიონისა და ღაზის მცხოვრებლებისთვის ჰუმანიტარული დახმარების გაწევის კურატორად.

მას უკვე 20-ზე მეტი ჯილდო აქვს, რომლებსაც 15 წლის ასაკიდან გადასცემენ — მას შემდეგ, რაც გროზნოს საგამოძიებო იზოლატორში ყურანის დაწვის საქმეზე დაკავებულ ნიკიტა ჟურაველს სცემა. ადამ კადიროვი ცემის გამო პასუხისგებაში არ მიუციათ, ხოლო ჟურაველს 2024 წლის თებერვალში, მორწმუნეთა გრძნობების შეურაცხყოფისა და რელიგიური სიძულვილით ხულიგნობის ბრალდებით, სამნახევარი წლით კოლონია მიუსაჯეს. 2024 წლის ნოემბერში კი მას სახელმწიფო ღალატის საქმეზე 13.5 წლით თავისუფლების აღკვეთა მიესაჯა.