"აშშ-მა უნდა აირჩიოს – ცეცხლის შეწყვეტა, თუ ომის გაგრძელება ისრაელის მეშვეობით“ - აბას არაღჩი

"აშშ-მა უნდა აირჩიოს – ცეცხლის შეწყვეტა, თუ ომის გაგრძელება ისრაელის მეშვეობით. ორივე ერთად ვერ იქნება. ბურთი ახლა აშშ-ის მოედანზეა და მსოფლიო აკვირდება, შეასრულებს თუ არა ის თავის ვალდებულებებს" | წერს ირანის საგარეო საქმეთა მინისტრი აბას არაღჩი X-ზე მას შემდეგ, რაც ისრაელმა ლიბანზე საჰაერო დარტყმები განახორციელა. ამ განცხადებას მან თან დაურთო პაკისტანის პრემიერმინისტრ შებაზ შარიფის განცხადება, რომელშიც შარიფი აღნიშნავს, რომ შეთანხმება ლიბანსაც მოიცავს

 ცოტა ხნის წინ ისრაელის თავდაცვის ძალებმა გაავრცელა ინფორმაცია, რომ ბეირუთში ახალი ავიადარტყმები განახორციელეს და მათი სამიზნე "ჰეზბოლას" მეთაური იყო. ამას ირანის გაღიზიანება მოჰყვა. ირანელმა მაღალჩინოსნებმა აშშ შეთანხმების დარღვევაში დაადანაშაულეს. ირანის პარლამენტის სპიკერმა თქვა, რომ შეერთებულმა შტატებმა სამი პუნქტი დაარღვია, მათ შორის ცეცხლის შეწყვეტის შეთანხმება ლიბანში, ირანის საჰაერო სივრცის დაურღვევლობა და ურანის გამდიდრების მხრივ ირანის უფლება. "ასეთ ვითარებაში ორმხრივი ცეცხლის შეწყვეტის შეთანხმება ან მოლაპარაკებები არაგონივრულია" - განაცხადა მან. აშშ-ის ვიცე-პრეზიდენტმა ვენსმა კი თქვა: "თუ ირანს სურს, რომ ლიბანის გამო ეს მოლაპარაკებები ჩაიშალოს, რასაც მათთან არაფერი აქვს საერთო, ეს საბოლოო ჯამში მათი არჩევანია. ჩვენ ვფიქრობთ, რომ ეს სისულელე იქნებოდა, მაგრამ ეს მათი არჩევანია. [...] ვფიქრობ, რომ ლიბანთან დაკავშირებული სიტუაცია გონივრული გაუგებრობაა. არც ჩვენ და არც ისრაელს არ გვითქვამს, რომ ლიბანი ცეცხლის შეწყვეტის შეთანხმების ნაწილი იქნებოდა"