ბანგკოკში, ლუდის ბარში გაჩენილმა ძლიერმა ხანძარმა, სულ მცირე, 27 ადამიანის სიცოცხლე შეიწირა

საშინელი ტრაგედია ბანგკოკში — ლუდის ბარში გაჩენილმა ძლიერმა ხანძარმა, სულ მცირე, 27 ადამიანის სიცოცხლე შეიწირა.

ტაილანდის დედაქალაქში, კვირა ღამით, Na Ladprao-ს ლუდის ბარში მასშტაბური ხანძარი გაჩნდა. ადგილზე გადაღებულ კადრებში ჩანს, როგორ ცდილობს ხალხი შენობიდან გამოღწევას, საიდანაც შავი კვამლის სქელი ღრუბელი ამოდის.

ბოლო მონაცემებით:
▪️ დაღუპულია 27 ადამიანი — ბევრი მათგანი მაშველებმა ბარის უკანა ნაწილში, საპირფარეშოებში იპოვეს.
▪️ 63 ადამიანი საავადმყოფოშია გადაყვანილი, მათგან 22-ის მდგომარეობა კრიტიკულია.
▪️ ვინაიდან ბევრს თან არ ჰქონდა პირადობის მოწმობა ან უგონო მდგომარეობაშია, დაშავებულების იდენტიფიცირება ამ დრომდე მიმდინარეობს.

ქვეყნის პრემიერ-მინისტრის განცხადებით, ერთ-ერთმა მუსიკოსმა მას უამბო, რომ სცენასთან ახლოს, ელექტროენერგიის გამანაწილებელი ფარიდან კვამლი შენიშნა, რასაც შუქის ჩაქრობა, აფეთქება და შენობის კვამლით მომენტალურად შევსება მოჰყვა. ქალაქის მერი კი აცხადებს, რომ გამოძიება ჭერის მასალებსა და ავარიული გასასვლელების შესაძლო ბლოკირებასაც შეამოწმებს, რამაც ხალხს ევაკუაცია გაურთულა.

შემთხვევის ადგილზე ამ დრომდე მუშაობენ ექსპერტ-კრიმინალისტები. შენობის წინ ტროტუარი დამწვარი ეკრანებით, დინამიკებითა და ელექტროგიტარითაა მოფენილი, შიგნით კი მხოლოდ ფერფლი და ნახშირად ქცეული მაგიდები დარჩა. ადგილზე მივიდნენ ბუდისტი ბერებიც დაღუპულთა სულებისთვის სალოცავად.

ეს ტაილანდში ღამის კლუბებში გაჩენილი პირველი ტრაგიკული ხანძარი არ არის — მსგავს შემთხვევებს 2022 წელს 14 ადამიანი ემსხვერპლა, ხოლო 2009 წლის ახალი წლის ღამეს, Santika-ს კლუბში მომხდარმა ხანძარმა 66 ადამიანის სიცოცხლე შეიწირა.