დრონების თავდასხმა ლაიფციგის აეროპორტზე - გერმანიის ხელისუფლება პასუხისმგებლობას რუსეთს აკისრებს

გერმანიის მთავრობამ ლაიფციგის აეროპორტში აგვისტოში მომხდარი დივერსიის ორგანიზებაში ოფიციალური მოსკოვი დაადანაშაულა და მკაცრი სანქციების პაკეტი დააანონსა.

როგორც გერმანიის შინაგან საქმეთა მინისტრმა, ალექსანდერ დობრინდტმა სამშაბათს გამართულ პრესკონფერენციაზე განაცხადა, ფედერალურმა მთავრობამ დაასკვნა, რომ მომხდარზე პასუხისმგებლობა რუსეთს ეკისრება. დასკვნა უპილოტო საფრენი აპარატების პარამეტრებისა და იმ კომპონენტების შესწავლის საფუძველზე გაკეთდა, რომლებიც სხვა ჰიბრიდულ ინციდენტებშიც გამოიყენებოდა.

მინისტრის თქმით, თავდასხმის დაგეგმვა პროფესიონალურად წარიმართა, თუმცა მის განხორციელებაზე „დაბალი დონის აგენტები“ იყვნენ პასუხისმგებლები. სადაზვერვო მონაცემები ასევე მიუთითებს პირებზე, რომლებიც „რუსეთის სახელმწიფო უწყებების დავალებით მოქმედებდნენ“. დობრინდტმა გააფრთხილა საზოგადოება შესაძლო ახალი ინციდენტების შესახებაც და აღნიშნა, რომ გერმანია ყოველდღიურად ხდება ჰიბრიდული სამხედრო ოპერაციების სამიზნე.

საპასუხო ზომების ფარგლებში, გერმანიის საგარეო საქმეთა მინისტრმა, იოჰან ვადეფულმა განაცხადა, რომ მთავრობამ მიიღო გადაწყვეტილება, 18 სექტემბრამდე დახუროს ბონში რუსეთის გენერალური საკონსულო და გაწყვიტოს შეთანხმება ბერლინში „რუსული სახლის“ საქმიანობის შესახებ. გარდა ამისა, ბერლინი ამკაცრებს რუსეთის მოქალაქეებისთვის ქვეყანაში შემოსვლის კონტროლს და აძლიერებს ზომებს რუსეთის „ჩრდილოვანი ფლოტის“ წინააღმდეგ.

გერმანიის საგარეო უწყების ხელმძღვანელის თქმით, ბერლინი არ დაუშვებს, რომ რუსულმა თავდასხმებმა საზოგადოების ერთიანობა დაარღვიოს, და კვლავინდებურად მტკიცედ გამოხატავს სოლიდარობას უკრაინის მიმართ.

მოსკოვში გერმანიის გადაწყვეტილებას უკვე გამოეხმაურნენ. რუსეთის საგარეო საქმეთა სამინისტროს წარმომადგენელმა, მარია ზახაროვამ განაცხადა, რომ „მოსკოვი ყველა ანტირუსულ გადაწყვეტილებაზე გასცემს პასუხს“.

თავის მხრივ, ევროკომისიის თავმჯდომარემ, ურსულა ფონ დერ ლაიენმა აღნიშნა, რომ ლაიფციგის ინციდენტს ნატოს გენერალურ მდივანთან, მარკ რუტტესთან ერთად განიხილავს. ნატოს ხელმძღვანელმა სრული სოლიდარობა გამოუცხადა გერმანიას და ხაზგასმით აღნიშნა, რომ ალიანსი მომავალშიც გააძლიერებს ნებისმიერი მტრული ქმედებისგან მოკავშირეების დაცვის საშუალებებს.

ლაიფციგის აეროპორტში 4 აგვისტოს უკრაინული სატვირთო თვითმფრინავის, ან-124-ის წინააღმდეგ დივერსიის მოწყობა სცადეს. გერმანული მედიის ცნობით, თავდასხმაში რამდენიმე დრონი მონაწილეობდა: ასაფეთქებელი მოწყობილობით აღჭურვილი ერთი უპილოტო აპარატი უკრაინული სატვირთო თვითმფრინავების სიახლოვეს იპოვეს, მეორე კი, სავარაუდოდ, DHL-ის სატვირთო თვითმფრინავს შეეჯახა. გერმანიის კანცლერმა ფრიდრიხ მერცმა განაცხადა, რომ ყველა დამნაშავე პასუხს აგებს.