ეგონა უკრაინას მალე აიღებდა... არსებობდა ზელენსკის ფიზიკურად განადგურების გადაწყვეტილება - გუდკოვი

რადიო "მაესტროს" გადაცემა "ინტერვიუში", ჟურნალისტ ლევან ჭითანავასთან საუბრისას ФСБ-ს გადამდგარი პოლკოვნიკი გენადი გუდკოვი აცხადებს, რომ პუტინს უკრაინის სწრაფი დაკავებისა და მასზე დასავლეთის ფრთხილი და დაგვიანებული რეაქციის იმედი ჰქონდა.

"პუტინს მართლა სჯეროდა იმის, რომ მცირე დანაკარგებით და სწრაფად შეძლებდა უკრაინის დაპყრობას, ამის შემდეგ კი ხელისუფლების შეცვლას შეძლებდა. ზელენსკისთან დაკავშირებით იყო ორი გეგმა: პირველი - ის უკრაინიდა უნდა გაქცეულიყო, მეორე - იყვნენ სპეციალური დანიშნულების ბატალიონები, რომლებიც მზად იყვნენ ზელენსკი მინიმუმ ხელისუფლებიდან მოეშორებინათ, ასევე არსებობდა გადაწყვეტილება მისი ფიზიკურად განადგურების. შესაბამისად, გეგმის მიხედვით ხელისუფლება უნდა შეცვლილიყო და ერთ-ერთ ვარიანტად იანუკოვიჩი განიხილებოდა, რისთვისაც ის ჯერ კიდევ „ინახება“ რუსეთში. იმის შემდეგ, რაც კრემლში იანუკოვიჩს მოღალატედ  და მატყუარად თვლიდნენ, მაინც იქნა გადაწყვეტილება მიღებული მისი „შენახვის“, რომელსაც საჭიროების შემთხვევაში დასვამდნენ მარიონეტად.

პუტინის გათვლებით, გამარჯვება მიღწეული იქნებოდა უკრაინაში ერთი კვირის, მაქსიმუმ ათი დღის განმავლობაში, კრემლი ბევრჯერ შეცდა, შეცდა უკრაინის ბრძოლისუნარიანობის შეფასებაში, მათ წარმოდგენაც არ ჰქონდათ იმაზე, რომ რუსებს უკრაინაში არავინ ელოდებოდა, არ ესმოდათ იმისა, რომ ვარდებით მოყრილი გზა და მარილით და პურით არავინ დახვდებოდა, ყველაზე მთავარი კი, მათ წარმოდგენაც კი არ ჰქონდათ დასავლეთის რეაქციაზე, კრემლმა უკრაინაში შეჭრით, ბარბაროსული ქმედებებით საერთაშორისო საზოგადოება გააერთიანა, რომელიც მიხვდა თუ რა საფრთხე მომდინარეობდა ცვილიზებული სამყაროსთვის რუსეთიდან. დასავლეთმა ისეთი მძიმე სანქციები აამოქმედა, რაც პუტინის რეჟიმს არც კი დაესიზმრებოდა. როდესაც კრემლში უკრაინაში შეჭრა იგეგმებოდა, როგორ გგონიათ, რატომ დაარქვეს სპეციალური სამხედრო ოპერაცია?  იმიტომ, რომ ეგონათ ძალიან მალე, ერთი-ორი და უკრაინა აღებული ექნებოდათ და იტყოდნენ, რა ომი, ოპერაცია დამთავრებულია.

შესაბამისად, ასე ოპერატიულად მიზნის მიღწევის შემდეგ, ფიქრობდნენ რომ სანქციების ამოქმედების გადაწყვეტილება არ იქნებოდა მიღებული. დასავლეთი, რომელსაც გადაწყვეტილების მიღებამდე სჩვევია ბევრი ფიქრი, შემდეგ კონსულტაციები, შეხვედრები, პარტნიორებთან საკითხის გატანა, ეს დროს მოითხოვდა და კრემლს ამიტომ სურდა რამდენიმე დღეში უკრაინის საკითხის გადაჭრა, რადგან სანქციების ამოქმედება ამ დროში არ მომხდარიყო. კრემლში ყველაზე რთულ გადაწყვეტილებად მიიჩნეოდა ე.წ. სვიფტის სისტემიდან რუსული ბანკების გათიშვა, შესაბამისად, აქამდე საკითხის მიყვანა არ იგეგმებოდა იმის ხარჯზე, რომ რამდენიმე დღეში სპეციალური ოპერაცია დასრულდებოდა, თუმცა, ეს ასე არ მოხდა, მათ ეს ვერ გათვალეს.

მე და თქვენ კარგად ვიცით, რომ გაერთიანებულმა დასავლეთმა არა მხოლოდ უპრეცედენტო სანქციების ამოქმედების გადაწყვეტილებები მიიღო, მათ შორის რუსული აქტივების გაყინვის, პერსონალური სანქციების ამოქმედება, არამედ 2023 წლისთვის ნავთობის და გაზის პრაქტიკულად სრული ემბარგოც ამოქმედდება. ამასთან, დასავლეთი უზარმაზარ სამხედრო დახმარებას უწევს უკრაინელ ხალხს, სამხედროსთან ერთად, მორალურს და ფინანსურ მხარდაჭერასაც უცხადებს, რაც უმნიშვნელოვანესია. უკრაინელი ხალხი  რომელიც გიგანტურ მილიტარიზებულ რუსეთს ებრძვის, რომელიც არამხოლოდ საკუთარ დემოკრატიას, არამედ საერთოდ მსოფლიოში დემოკრატიულ ფასეულობებსაც იცავს," - აცხადებს გუდკოვი.