ფილიპინების ყოფილი დიქტატორი როდრიგო დუტერტე ჰააგის სასამართლოს ორდერით დააკავეს

ფილიპინების ყოფილი პრეზიდენტი, როდრიგო დუტერტე, სამშაბათს დააკავეს ჰააგის საერთაშორისო სისხლის სამართლის სასამართლოს (ICC) ორდერის საფუძველზე, რომლითაც მას კაცობრიობის წინააღმდეგ ჩადენილ დანაშაულებში ედება ბრალი.

79 წლის დუტერტე, რომელიც 2022 წელს გადადგა თანამდებობიდან, მანილას საერთაშორისო აეროპორტში ჰონგ-კონგიდან დაბრუნებისას დააკავეს.

ადამიანის უფლებათა ჯგუფების ინფორმაციით, დუტერტეს "ნარკოტიკების წინააღმდეგ ბრძოლის" პოლიტიკის ფარგლებში ათიათასობით მშვიდობიანი მოქალაქე ექსტრემალური ძალადობის შედეგად დაიღუპა. ამ ბრალდებებს ყოფილი პრეზიდენტი უარყოფდა. 2016 წელს მან სწორედ ნარკოტიკების წინააღმდეგ მკაცრი პოლიტიკის დაპირებით მოიპოვა მხარდაჭერა და ეს კამპანია მისი მმართველობის ერთ-ერთი მთავარი მახასიათებელი გახდა.

პრეზიდენტ ფერდინანდ მარკოსის ადმინისტრაციის განცხადებით, დუტერტე ამ დროისთვის დაკავებულია და ჯანმრთელობის მდგომარეობა სტაბილურია.

ყოფილი პრეზიდენტის ადვოკატმა და ყოფილმა პრესმდივანმა, სალვადორ პანელომ, განაცხადა, რომ მისი დაკავება უკანონოა და მას ამ ეტაპზე არ აქვს შესაბამისი იურიდიული დაცვა.

ფილიპინები 2019 წელს, დუტერტეს პრეზიდენტობის პერიოდში, საერთაშორისო სისხლის სამართლის სასამართლოდან გავიდა, თუმცა მარკოსმა ადრე განაცხადა, რომ საჭიროების შემთხვევაში მისი მთავრობა დუტერტეს დაკავების მოთხოვნასთან ითანამშრომლებდა.

დუტერტეს მოულოდნელმა მოგზაურობამ ჰონგ-კონგში – რომელიც ასევე არ არის ICC-ის წევრი – გააჩინა ეჭვები, რომ ის შესაძლოა დაკავებას არიდებდა თავს.

"რა არის ჩემი დანაშაული? ჩემს დროს ყველაფერი გავაკეთე მშვიდობისთვის და ფილიპინელი ხალხის უკეთესი ცხოვრებისთვის," – განაცხადა დუტერტემ ჰონგ-კონგში, სადაც ფილიპინელ ემიგრანტებს მიმართა.

ჰააგის სასამართლოს გამოძიება მოიცავს ნარკოდანაშაულებთან დაკავშირებულ მკვლელობებს 2011 წლიდან, როცა დუტერტე სამხრეთ ქალაქ დავაოს მერი იყო, 2019 წლამდე, როდესაც ფილიპინებმა საერთაშორისო სასამართლო დატოვა. უფლებადამცველები ამ ნაბიჯს დუტერტეს პასუხისმგებლობის თავიდან არიდების მცდელობად აფასებდნენ.