„ჯეფრი ეპსტინმა ჩემს წინააღმდეგ შეთქმულება მოაწყო.... რა სიგიჟეა“ - ტრამპი

„ჯეფრი ეპსტინმა ჩემს წინააღმდეგ შეთქმულება მოაწყო. ეს გუშინ გამოქვეყნდა მილიონობით გვერდის მქონე დოკუმენტების სახით. რა სიგიჟეა ეს. მან შეთქმულება მოაწყო ჩემ წინააღმდეგ, რათა დარწმუნებულიყო, რომ არჩევნებში წავაგებდი. ეს ერთადერთი რამ იყო, რაც ჩემზე იყო ნახსენები. ვფიქრობ, ნამდვილად დროა, ქვეყანა სხვა რამეზე გადაერთოს. ახლა იცით, რომ ჩემ შესახებ არაფერი გამოვლენილა, გარდა იმისა, რომ ეს იყო შეთქმულება ჩემს წინააღმდეგ ეპშტეინისა და სხვა ადამიანების მიერ. ვფიქრობ, დროა, ქვეყანა სხვა რამეზე გადაერთოს, მაგალითად ჯანდაცვაზე, ისეთ რამეზე, რაც ხალხს ადარდებს“ | განაცხადა აშშ-ის პრეზიდენტმა დონალდ ტრამპმა ჟურნალისტებთან.  აშშ-ის იუსტიციის დეპარტამენტმა ფინანსისტ ჯეფრი ეპსტინის ფაილებიდან სამ მილიონზე მეტი გვერდი გამოაქვეყნა, მათ შორის ორი ათასი ვიდეო და 180 ათასი ფოტო. ახალმა დოკუმენტებმა გამოავლინა ეპსტინის კავშირები რამდენიმე ლიეტუველ მხატვარსა და მოდელთან, ასევე პეტრეიკისების ოჯახთან, რომელთა კულტურულმა ორგანიზაციებმა ეპსტინის ფონდიდან ათიათასობით ევრო მიიღეს  2025 წლის 20 ნოემბერს ტრამპმა ხელი მოაწერა კანონპროექტს, რომელიც იუსტიციის დეპარტამენტს ეპსტინის ფაილების გასაჯაროებას ავალებდა. საქმის შესახებ დოკუმენტები წლების განმავლობაში გასაიდუმლოებული იყო - 2024 წლის დასაწყისში მხოლოდ მათი ნაწილი გასაჯაროვდა, თუმცა, როგორც მაშინ მედია წერდა, აღნიშნული დოკუმენტები ხმამაღალ გამოაშკარავებებს არ მოიცავდა და მოცემული ინფორმაციის დიდი ნაწილი მედიითა და სასამართლო პროცესებით უკვე ისედაც გავრცელებული იყო. ეპსტინი ციხეში 2019 წელს გარდაიცვალა და ეს ფაქტი ოფიციალურად თვითმკვლელობად გამოცხადდა, თუმცა მალევე გაჩნდა არაერთი კონსპირაციული ეჭვი იმის თაობაზე, რომ, თითქოს, ის სპეციალურად მოკლეს, რათა გავლენიანი ადამიანების შესახებ ინფორმაცია არ გაევრცელებინა