კადიროვმა რუსეთში უმაღლესი სამხედრო წოდება, ოქროს სამხრეები და ენდროსფერი ბერეტი მიიღო

„როსგვარდიის“ დირექტორმა, ვიქტორ ზოლოტოვმა, ჩეჩნეთის ხელმძღვანელს, რამზან კადიროვს, არმიის გენერლის სამხრეები და ენდროსფერი („კრაპის“) ბერეტი გადასცა, იუწყება TASS-ი.

ზოლოტოვის განცხადებით, კადიროვს წოდება ვლადიმირ პუტინმა აუმაღლა, ხოლო მას, ზოლოტოვს, დაევალა პუტინის ბრძანებულების გაცნობა და არმიის გენერლის ოქროს სამხრეების გადაცემა.

„მაგრამ ეს ყველაფერი არ არის. სამი დღის წინ აღვნიშნეთ უწყებრივი სპეციალური დანიშნულების ძალების დაარსების მორიგი წლისთავი, სადაც სათავე დაედო „კრაპის“ ბერეტის გადაცემის ტრადიციას. მადლიერების ნიშნად... მიღებულია გადაწყვეტილება, არმიის გენერალ კადიროვს ეს უმნიშვნელოვანესი სიმბოლოც გადაეცეს“, — განაცხადა ზოლოტოვმა.

მანამდე კადიროვი გენერალ-პოლკოვნიკის წოდებას ატარებდა, რომელიც 2022 წელს მიიღო. არმიის გენერლის წოდება დე-ფაქტო უმაღლესია რუსულ არმიაში - მასზე მაღალი მხოლოდ მარშლის წოდებაა, თუმცა 1997 წლის შემდეგ იგი არავისთვის მიუნიჭებიათ, წერს „ვაჟნიე ისტორიი“.

„კრაპის“ (ენდროსფერი) ბერეტი „როსგვარდიის“ სპეცდანიშნულების დანაყოფებსა და ზოგოერთ სხვა ძალოვან სტრუქტურაში გამორჩევის უმაღლეს ფორმად ითვლება. მის მისაღებად აუცილებელია გამოცდების სერიის გავლით დამტკიცება, რაც ზოგჯერ მონაწილეთა დაღუპვითაც სრულდება. ამ გამოცდებში რამზან კადიროვის მონაწილეობის შესახებ არაფერია ცნობილი, თუმცა მას „კრაპის“ ბერეტი წარსულშიც ეხურა.