ხელისუფლების ცვლილება გერმანიაში - შეძლებს თუ არა სოციალ-დემოკრატიული პარტია კოალიციის შექმნას

26 სექტემბერს ჩატარებული საპარლამენტო არჩევნების ოფიციალური წინასწარი შედეგების მიხედვით, გერმანიაში პოლიტიკურ ძალთა ბალანსი შემდეგნაირად გადანაწილდა: სოციალ-დემოკრატიული პარტია - 25,7%, მემარჯვენე ცენტრისტული ბლოკი ქრისტიან-დემოკრატიული კავშირი/ქრისტიან სოციალური კავშირი - 24,1%, მწვანეები - 14,8%, თავისუფალი დემოკრატები - 11,5% და "ალტერნატივა გერმანიისთვის" - 10,3.

არჩევნების მთავარი სიურპრიზი ის არის, რომ ანგელა მერკელის წასვლის შემდეგ, ქრისტიან-დემოკრატებმა ისტორიულად ყველაზე დაბალი შედეგი აჩვენეს - მეორე მსოფლიო ომის შემდეგ ჩატარებული 19 არჩევნებიდან ბლოკი 30% არასდროს ჩამოსცილებია.

გასულ არჩევნებთან შედარებით უკეთესი შედეგები აჩვენეს სდპგ-მ, მწვანეებმა და თავისუფალმა დემოკრატებმა, მცირედით გაუარესდა "ალტერნატივის" შედეგი. ბარიერი ვერ გადალახა მემარცხენე პარტიამ, მაგრამ რადგან მას 3 მაჟორიტარი დეპუტატის მანდატი გააჩნია, შეუძლია თავისი ფრაქცია ჩამოაყალიბოს. 

არჩევნების შედეგებიდან გამომდინარე, მთავრობის დაკომპლექტებაზე განაცხადი ორივე ლიდერმა პარტიამ წარადგინა. ასევე ცხადია, რომ მთავრობაში აუცილებლად იქნებიან მწვანეები და თავდეკები, რადგან ვერცერთი ლიდერი პარტია მათ გარეშე კოალიციურ მთავრობას ვერ შექმნის. არც სოციალ-დემოკრატები და არც ქრისტიან დემოკრატები არ აპირებენ "ალტერნატივასთან" კოალიციაში გაერთიანებას, ხოლო დასუსტებული მემარცხენე პარტიის მანდატები არავის სჭირდება.

არსებობს კიდევ ერთი ვარიანტი, რომ შენარჩუნდეს ბოლო რვა წლის განმავლობაში არსებული სამთავრობო კოალიცია - სოცდეკებისა და ქრისტიან დემოკრატების შემადგენლობით, ოღონდ შეცვლილი ფუნქციებით - კოალიციის ლიდერის ფუნქცია უკვე სოციალისტებს ექნებათ. ამ ვარიანტს, ჯერჯერობით, ორივე პარტიის ხელმძღვანელი გამორიცხავს. 

დღეს ექსპერტები სწორედ მწვანეებისა და თავისუფალი დემოკრატების პოზიციებზე მსჯელობენ. მწვანეების მემარცხენეობა მათ სოციალ-დემოკრატებთან ალიანსს უფრო რეალისტურად წარმოაჩენს. არ არის გამორიცხული, მათ თავისუფალი დემოკრატებიც შეუერთდნენ.