მერცის იერიში AfD-ზე: გერმანიის კანცლერი ვაიდელის პარტიას „ეთნიკური წმენდის“ სურვილსა და პუტინის მხარდაჭერაში ადანაშაულებს

გერმანიის კანცლერმა, ფრიდრიხ მერცმა, ბუნდესტაგში გამართული გენერალური დებატების დროს პარტია „ალტერნატივა გერმანიისთვის“ (AfD) მწვავედ გააკრიტიკა. მერცმა მემარჯვენე-პოპულისტური პარტიის მიგრაციული ხედვები და საგარეო პოლიტიკური კურსი ღიად დაუპირისპირა ხელისუფლების პოზიციას და AfD დესტრუქციულ ძალად შეაფასა.

დებატების ერთ-ერთი ყველაზე ცხელი თემა მიგრაციული პოლიტიკა გახდა. კანცლერმა განაცხადა, რომ AfD-ის მიერ პროპაგანდირებული „რემიგრაციის“ კონცეფცია, არსებითად, კანის ფერისა და წარმოშობის მიხედვით ეთნიკურ წმენდას წარმოადგენს.

მერცმა ხაზი გაუსვა უცხოური წარმოშობის მოქალაქეთა მნიშვნელოვან როლს ქვეყნის ეკონომიკაში:

„ხელოსნობის სექტორში ყოველი მეექვსე დასაქმებული უცხოური პასპორტის მფლობელია. AfD-ის გეგმა რომ განხორციელდეს, გერმანიაში ეს სექტორი უბრალოდ პარალიზდება - ვეღარ იმუშავებს ვერცერთი მოხუცებულთა თავშესაფარი, ვერცერთი საავადმყოფო და ვერცერთი რესტორანი.“

კანცლერმა განმარტა, რომ მთავრობა მკვეთრად მიჯნავს ერთმანეთისგან იმ პირებს, რომლებიც გერმანიაში კანონიერად შრომობენ და დოვლათს ქმნიან, მათგან, ვისაც ქვეყანაში დარჩენის სამართლებრივი საფუძველი არ აქვს და ვალდებულია ტერიტორია დატოვოს.

AfD-მა ეს ბრალდებები კატეგორიულად უარყო. პარტიის საპარლამენტო მდივნის, ბერნდ ბაუმანის განცხადებით, „რემიგრაციაში“ ისინი მოიაზრებენ მხოლოდ იმ უცხოელთა თანმიმდევრულ დეპორტაციას, რომლებსაც ქვეყანაში დარჩენის უფლება კანონით არ აქვთ.

ფრიდრიხ მერცმა კიდევ ერთხელ დაადასტურა ოფიციალური ბერლინის უცვლელი პოზიცია უკრაინასთან მიმართებით და AfD-ის თანათავმჯდომარე ალის ვაიდელი აგრესორისა და მსხვერპლის როლების „გროტესკულ ცვლილებაში“ დაადანაშაულა.

„ჩვენ მხარს ვუჭერთ და კვლავაც დავუჭერთ უკრაინას, რადგან ის ჩვენს თავისუფლებასაც იცავს. რუსეთს არავინ დამუქრებია - არც ნატო, არც ევროკავშირი და არც გერმანია. ერთადერთი, რაც რეალურად ემუქრება რუსეთსა და პუტინს, დემოკრატიის მიმზიდველობაა.“

მერცის თქმით, სწორედ საგარეო, ევროპულ და უსაფრთხოების პოლიტიკაზე გადის ის ღრმა უფსკრული, რომელიც დემოკრატიულ პარტიებსა და AfD-ს შორის არსებობს. მან ასევე გაიხსენა 4 აგვისტოს ლაიფციგის აეროპორტზე განხორციელებული დრონების შეტევა და აღნიშნა, რომ გერმანიას საკუთარი უსაფრთხოების დაცვა ახალ რეალობაში უწევს.

კანცლერმა ყურადღება გაამახვილა ზაქსენ-ანჰალტის მიწის არჩევნების შედეგებზეც. მისი თქმით, მიუხედავად იმისა, რომ AfD-მა მაღალი შედეგი აჩვენა, მან ვერ მიაღწია მთავარ მიზანს — აბსოლუტურ უმრავლესობას.

„ზაქსენ-ანჰალტში ამომრჩეველთა 56%-მა თქვენ მხარი არ დაგიჭირათ. ამ პოლიტიკით გერმანიაში უმრავლესობას ვერასდროს მოიპოვებთ. თქვენ იყავით და რჩებით დესტრუქციულ ძალად.“

მერცის განცხადებით, არჩევნებიდან რამდენიმე საათში AfD-მა საკუთარ კანდიდატ ულრიხ ზიგმუნდს კოალიციური პარტნიორების ძებნისკენ მოუწოდა, რითაც დაარღვია წინასაარჩევნო დაპირება, რომლის მიხედვითაც მმართველი გუნდის ფორმირებას მხოლოდ აბსოლუტური უმრავლესობის მოპოვების შემთხვევაში შეეცდებოდა.

AfD-ის ლიდერმა, ალის ვაიდელმა, კანცლერის ბრალდებებს მკვეთრი გამოსვლით უპასუხა. მან განაცხადა, რომ ზაქსენ-ანჰალტში ქრისტიან-დემოკრატიული კავშირი (CDU) „განადგურდა“ და მერცმა ამომრჩევლის გზავნილი ვერ გაიგო.

„ეს უკვე აღარც არის რელევანტური, რადგან თქვენი დრო ისედაც ამოიწურა. მოქალაქეებს პოლიტიკური კურსის შეცვლა სურთ და ისინი ამას მიიღებენ.“

ვაიდელმა მთავრობის ენერგეტიკული პოლიტიკა ეკონომიკის განადგურებაში დაადანაშაულა, ხოლო საგარეო კურსს „ომის პროპაგანდა“ და რუსეთთან კონფრონტაციის ხელოვნური ესკალაცია უწოდა.

ბუნდესტაგში გამართულ დებატებში AfD-ის წინააღმდეგ ერთობლივი პოზიციით გამოვიდნენ სხვა პოლიტიკური ჯგუფებიც:

SPD (სოციალ-დემოკრატები): ფრაქციის ლიდერმა მათას მირშმა მოუწოდა დემოკრატიულ პარტიებს, გაერთიანდნენ, რათა მაგდებურგში (ზაქსენ-ანჰალტი) AfD-ის მეთაურობით მთავრობის ფორმირება არ დაუშვან.

CDU/CSU (ქრისტიან-დემოკრატები): თორსტენ ფრაიმ აღნიშნა, რომ AfD-ის მოთხოვნა შენგენის ზონისა და ევროკავშირის დატოვების შესახებ გერმანიის საექსპორტო ეკონომიკასა და სამუშაო ადგილებს პირდაპირ საფრთხეს უქმნის.

მწვანეები: კათარინა დროგემ განაცხადა, რომ AfD-ის მზარდი რადიკალიზაციის ფონზე, დადგა დრო, ოფიციალურად შემოწმდეს პარტიის აკრძალვის სამართლებრივი საფუძვლები.