ნეაპოლის რეგიონში 4.7 მაგნიტუდის მიწისძვრა დაფიქსირდა: დაშავებულია ოთხი მოქალაქე, დაზიანებულია ინფრასტრუქტურა

სამხრეთ იტალიაში, ნეაპოლის სიახლოვეს მდებარე ფლეგრეს ველების ვულკანურ ზონაში 4.7 მაგნიტუდის სიმძლავრის მიწისძვრა მოხდა. წინასწარი მონაცემებით, დაშავებულია ოთხი ადამიანი. დაზიანდა საცხოვრებელი შენობები და რამდენიმე საკულტო ნაგებობა.

იტალიის გეოფიზიკისა და ვულკანოლოგიის ეროვნულმა ინსტიტუტმა (INGV) ძირითადი ბიძგის შემდეგ 10 მცირე ბიძგი აღრიცხა. უწყების განცხადებით, პარასკევს დაფიქსირებული სეისმური აქტივობა ყველაზე ძლიერი იყო ფლეგრეს ველების რეგიონში ბოლო პერიოდში დაფიქსირებულ ბიძგებს შორის. მიწისძვრა იგრძნობოდა როგორც უშუალოდ ნეაპოლში, ისე მომიჯნავე მუნიციპალიტეტებში.

იტალიის სამოქალაქო დაცვის მინისტრის, ნელო მუსუმეჩის ინფორმაციით, დაშავებულებს შესაბამისი დახმარება უტარდებათ. უწყებამ კრიზისული მართვის ცენტრი გაააქტიურა, საგანგებო სამსახურები კი მიყენებული ზარალის ოდენობას ადგენენ.

უსაფრთხოების ზომებიდან გამომდინარე, შემოწმების დასრულებამდე დროებით შეჩერდა მატარებლების მოძრაობა Cumana-სა და Circumflegrea-ს სარკინიგზო ხაზებზე, რომლებიც ნეაპოლს ფლეგრეს ველების დასახლებებთან აკავშირებს.

ადგილობრივმა ხელისუფლებამ მოსახლეობას სიმშვიდის შენარჩუნებისა და ოფიციალური რეკომენდაციების გათვალისწინებისკენ მოუწოდა. მიწისძვრის შედეგად მოსახლეობის ნაწილმა შენობები დატოვა. ნეაპოლის გარკვეულ უბნებსა და მის შემოგარენში ასევე აღინიშნა ელექტროენერგიის მიწოდების შეფერხება.