პაველ დუროვი რუსეთში ტერორისტების სიაში შეიყვანეს

Telegram-ის დამფუძნებელი პაველ დუროვი „როსფინმონიტორინგის“ ტერორისტთა და ექსტრემისტთა ნუსხაში დაამატეს. შესაბამისი ჩანაწერი, 6894-ე ნომრით, „ფიზიკური პირების“ განყოფილებაში გამოჩნდა, — იუწყება RBC.

აღნიშნულ სიაში მოხვედრა მთელ რიგ შეზღუდვებს ითვალისწინებს: ბანკები ვალდებულნი არიან გაყინონ პირის ფულადი სახსრები და სხვა ქონება, ხოლო ფინანსური ოპერაციების უმეტესობის განხორციელება შეუძლებელი ხდება.

29 ივლისის დილას, „ფსბ“-ს (FSB) საზოგადოებასთან ურთიერთობის ცენტრმა გავრცელა ინფორმაცია, რომ დუროვს ბრალი ტერორისტულ საქმიანობაში ხელშეწყობისთვის წაუყენეს. უწყების ვერსიით, Telegram-ის ადმინისტრაციამ არ წაშალა არხები, ჩატები და ბოტები, რომლებსაც უკრაინული სპეცსამსახურები რუსეთში ტერაქტების მოსამზადებლად იყენებდნენ.

კერძოდ, სისხლის სამართლის საქმე უკავშირდება გაცნობის ჩატ-ბოტ „დაივინჩიკს“ (Дайвинчик/Leo), რომელსაც, უწყების ცნობით, ახალგაზრდა რუსების დივერსიულ-ტერორისტულ საქმიანობაში ჩასაბმელად იყენებდნენ. „ფსბ“-ს მონაცემებით, 2025 წლის ივლისიდან დღემდე დაკავებულია „დაივინჩიკის“ მეშვეობით გადაბირებული 46 ახალგაზრდა. გამოძიება ამტკიცებს, რომ უკრაინის სპეცსამსახურების დავალებით ისინი თავს ესხმოდნენ პოლიციის თანამშრომლებს და ცეცხლს უკიდებდნენ სხვადასხვა ობიექტს.

უწყებამ ასევე განაცხადა, რომ დაიწყო პაველ დუროვზე საერთაშორისო ძებნის გამოცხადების პროცედურა.