პოლიტიკური მიწისძვრა გერმანიაში – ფრიდრიხ მერცმა საქსონია-ანჰალტში არჩევნების შედეგს "ათწლეულების უმძიმესი მარცხი" უწოდა

გერმანიის კანცლერმა ფრიდრიხ მერცმა საქსონია-ანჰალტის რეგიონულ არჩევნებში „ქრისტიან-დემოკრატიული კავშირის“ (CDU) სავალალო შედეგები პარტიისა და პირადად მისთვის შოკისმომგვრელად შეაფასა. ბერლინში გამართულ ბრიფინგზე მერცმა განაცხადა, რომ არჩევნების შედეგებს აუცილებლად ექნება სერიოზული პოლიტიკური შედეგები.

„გუშინდელი დღის შემდეგ რაღაც შეიცვალა არა მხოლოდ საქსონია-ანჰალტში, არამედ მთელ გერმანიაში. ეს არის ჩვენი პარტიის უმძიმესი მარცხი ბოლო ათწლეულების განმავლობაში. ასეთ შედეგს არ ველოდით. ეს გავლენას ახდენს თითოეულ ჩვენგანზე და პირადად ჩემზეც. შესაბამისად, ჩვეულ რეჟიმში მუშაობის გაგრძელება შეუძლებელია – ამას, რა თქმა უნდა, ექნება თავისი შედეგები“, - აღნიშნა გერმანიის კანცლერმა.

მძიმე პოლიტიკური წნეხისა და კრიტიკის მიუხედავად, ფრიდრიხ მერცმა ხაზგასმით აღნიშნა, რომ იგი არ აპირებს დასახული რეფორმების კურსიდან გადახვევას:

„ჩვენი ინსტიტუტები მყარი და მდგრადია. კონსტიტუცია იცავს ჩვენს დემოკრატიას და ის უზენაესი იქნება. გერმანია ყოველთვის შეინარჩუნებს თავის მტკიცე ადგილს ევროპაში. რეფორმები აუცილებელია, თუმცა ჩვენ უნდა ვეცადოთ, უკეთესად ავუხსნათ ეს ცვლილებები საზოგადოებას. ბევრ ადამიანს აქვს შეშფოთება და ამ არჩევნების შემდეგ ეს შიში კიდევ უფრო გაიზარდა.“ - აღნიშნა მერცმა

საქსონია-ანჰალტის რეგიონულ არჩევნებში ულტრამემარჯვენე პარტიამ „ალტერნატივა გერმანიისთვის“ (AfD) ისტორიულ გამარჯვებას მიაღწია – პრორუსულმა და მკვეთრად ანტიმიგრაციულმა ძალამ ხმათა 43.8% (40 მანდატი) მოიპოვა. ეს არის პირველი შემთხვევა მეორე მსოფლიო ომის შემდეგ, როდესაც ულტრამემარჯვენე პარტია ასე ახლოსაა რეგიონული მთავრობის სათავეში მოსვლასთან.

იმავდროულად, მერცის მმართველ პარტიას (CDU), რომელიც საქსონია-ანჰალტს ბოლო 24 წელი მართავდა, მხარდაჭერა გაუნახევრდა – 37.1%-დან 17.2%-მდე (15 მანდატი) დაეცა.

(ამომრჩეველთა აქტივობამ სარეკორდო 77.8% შეადგინა).

AfD-ს ადგილობრივ ასამბლეაში უმრავლესობისთვის (42 მანდატი) მხოლოდ 2 დეპუტატის მხარდაჭერა აკლია. AfD-ის ლიდერი, 35 წლის ულრიხ ზიგმუნდი აცხადებს, რომ პარტია მზადაა მცირე ჯგუფებთან და ცალკეულ დეპუტატებთან თანამშრომლობისთვის.

მთავრობის ფორმირების ძირითადი გზები:

1. ალიანსი BSW-სთან: მემარცხენე-პოპულისტური პარტიის (BSW) წარმომადგენლებმა უკვე გამოხატეს მზადყოფნა, მხარი დაუჭირონ AfD-ის კანდიდატს პრემიერის პოსტზე.

2. ანტი-AfD კოალიცია: დანარჩენი ხუთივე პარტიის (CDU, SPD, მწვანეები, მემარცხენეები, BSW) გაერთიანება, რაც იდეოლოგიური აცდენების გამო პრაქტიკულად შეუძლებლად ითვლება.

არჩევნების შედეგებს საერთაშორისო რეზონანსი მოჰყვა. ილონ მასკმა AfD-ს გამარჯვება სოციალურ ქსელში მოკლე ფრაზით – „Well done!“ მიულოცა. დონალდ ტრამპმა არჩევნების შედეგების ფოტო გამოაქვეყნა საკუთარ პლატფორმაზე. დონალდ ტუსკმა (პოლონეთის პრემიერ-მინისტრი) მკვეთრად უარყოფითი შეფასება მისცა მომხდარს: „ გერმანიაში AfD-ის ტრიუმფი  პოლონეთში მხოლოდ იდიოტებს ან მოღალატეებს თუ შეიძლება უხაროდეთ“.

არჩევნების ეს შედეგი უმძიმესი დარტყმაა პირადად კანცლერ ფრიდრიხ მერცისთვის, რომელმაც ხელისუფლების სათავეში მოსვლისას პირობა დადო, რომ ულტრამემარჯვენეების გავლენებს შეამცირებდა.