პუტინმა, ალიევმა და ფაშინიანმა მოჯთაბა ხამენეის ირანის ახალ უზენაეს ლიდერად არჩევა მიულოცეს

რუსული სამთავრობო მედიის ინფორმაციით, ვლადიმირ პუტინმა აშშ-ისრაელის იერიშების შედეგად მოკლული აიათოლა ალი ხამენეის ვაჟს, მოჯთაბა ხამენეის ირანის ახალ უზენაეს ლიდერად არჩევა მიულოცა.

გავრცელებული ინფორმაციით, პუტინმა თეირანს ურყევი მხარდაჭერა გამოუცხადა და ირანელი ხალხისადმი რუსეთის სოლიდარობა გამოხატა.

*
აზერბაიჯანის პრეზიდენტმა ილჰამ ალიევმა მოჯთაბა ხამენეის ირანის ახალ უზენაეს ლიდერად არჩევა მიულოცა. წერილს მისი პრესსამსახური ავრცელებს. "პატივცემულო აიათოლა ხამენეი, გილოცავთ ირანის ისლამური რესპუბლიკის უზენაესი ლიდერის თანამდებობაზე არჩევას. მინდა, კიდევ ერთხელ გამოვხატო ჩემი სამძიმარი მამათქვენის, აიათოლა ალი ხამენეის, ირანის ისლამური რესპუბლიკის უზენაესი ლიდერის, ტრაგიკული გარდაცვალების გამო. აზერბაიჯანის რესპუბლიკასა და ირანის ისლამურ რესპუბლიკას შორის ურთიერთობები გამომდინარეობს ჩვენი ხალხების ნებიდან, რომლებიც ისტორიულად კეთილმეზობლობასა და მეგობრობაში ცხოვრობდნენ.გამოვთქვამ იმედს, რომ ჩვენი ხალხების ინტერესების შესაბამისად, ურთიერთპატივისცემისა და ნდობის სულისკვეთებით, ერთობლივ ძალისხმევას გავაგრძელებთ ჩვენი სახელმწიფოთაშორისი ურთიერთობების განვითარებისათვის. კიდევ ერთხელ გილოცავთ ამ მაღალ თანამდებობაზე დანიშვნას. მშვიდობასა და სიმშვიდეს ვუსურვებ ირანის მეგობარ და მოძმე ხალხს“ | ნათქვამია ალიევის მისალოც წერილში.

*
სეიდ მოჯთაბა ხამენეის უზენაეს ლიდერად არჩევა ნიკოლ ფაშინიანმაც მიულოცა. "გილოცავთ ირანის ისლამური რესპუბლიკის უზენაეს ლიდერად არჩევას. დარწმუნებული ვარ, რომ სომხეთსა და ირანს შორის არსებული მტკიცე კავშირები კვლავაც გაგრძელებს განვითარებას და ახალ წარმატებებს მიაღწევს. ამ შემთხვევით ვსარგებლობ და მეგობარ ირანელ ხალხს კეთილდღეობასა და მყარ მშვიდობას ვუსურვებ“ | წერია პრემიერ-მინისტრის აპარატის მიერ გავრცელებულ გზავნილში.

მოჯთაბას არჩევის შემდეგ აშშ-ს პრეზიდენტმა დონალდ ტრამპმა Fox News-თან საუბრისას აღნიშნა, რომ ირანის ახალი უზენაესი ლიდერით "კმაყოფილი არ არის".