რატკო მლადიჩი, რომელიც ბალკანეთის ომების დროს სრებრენიცას ხოცვა-ჟლეტასა და სარაევოს ალყას ხელმძღვანელობდა, 84 წლის ასაკში მოკვდა

ბოსნიელ სერბთა გენერალი რატკო მლადიჩი, რომელიც ბალკანეთის ომების დროს სრებრენიცას ხოცვა-ჟლეტასა და სარაევოს ალყას ხელმძღვანელობდა, 84 წლის ასაკში მოკვდა

ინფორმაცია სერბეთის საზოგადოებრივმა მაუწყებელმა (RTS) გავრცელა, ხოლო მისი სიკვდილი Reuters-ს მლადიჩის ადვოკატმა დაუდასტურა.

„ბოსნიელი ყასბის“ სახელით ცნობილ მლადიჩს 2017 წელს ყოფილი იუგოსლავიის საერთაშორისო სისხლის სამართლის ტრიბუნალმა (ICTY) სამუდამო პატიმრობა მიუსაჯა 1990-იანი წლების დასაწყისში ბოსნიის არასერბი მოსახლეობის წინააღმდეგ ეთნიკური წმენდის კამპანიის ორგანიზებისთვის.

გაეროს მიერ დაფუძნებულმა სასამართლომ იგი დამნაშავედ ცნო გენოციდში, კაცობრიობის წინააღმდეგ მიმართულ დანაშაულებში, დევნაში, მასობრივ განადგურებაში, მკვლელობაში, ტერორში, მშვიდობიან მოსახლეობაზე უკანონო თავდასხმებსა და მძევლების ხელში ჩაგდებაში.

მლადიჩისთვის ბრალის წაყენებისას ტრიბუნალის მოსამართლემ, ფუად რიადმა ყოფილი გენერლის ქმედებებს „წარმოუდგენელი სიველურე“ უწოდა.

მლადიჩი ჰააგაში, გაეროს დაკავების ცენტრში სამუდამო სასჯელს იხდიდა.

გასულ კვირას მისმა ადვოკატებმა ჰუმანიტარული საბაბით მისი ვადაზე ადრე გათავისუფლების მოთხოვნა წარადგინეს. ისინი ციხის ექიმების დასკვნას ეყრდნობოდნენ, სადაც აღნიშნული იყო, რომ მისი „ზოგადი მდგომარეობა სწრაფად გაუარესდა“ და გარდაცვალება „ნებისმიერ დროს იყო მოსალოდნელი“. მოთხოვნა არ დაკმაყოფილდა.